МИБ Уйчи туман бўлими иш юритувига умумий қиймати 228 миллион сўм бўлган чилим тайёрлашда ҳид берувчи маҳсулот билан боғлиқ ҳужжатлар келиб тушди. Бу ҳақда «Дарё» мухбири Азизбек Абдувалиев хабар бермоқда.
Маълум бўлишича, мазкур маҳсулот жорий йилнинг 2 февраль куни икки нафар фуқаро томонидан Isuzu русумли автомашинада Тошкентга олиб кетилаётганда ҳуқуқни муҳофаза қилиш идоралари ходимлари томонидан тўхтатиб қолинган. Олиб борилган тезкор суриштирувлар давомида ҳеч қандай ҳужжатлари бўлмаган маҳсулот номаълум шахсдан сотиб олингани аниқланган.
Санитария-эпидемиологик осойишталик ва жамоат саломатлиги хизмати Наманган вилоят бошқармасининг хулосасида жами 598 дона идишдаги маҳсулот хорижда ишлаб чиқарилгани, мувофиқлик сертификати йўқлиги сабабли реализацияга рухсат этилмаслиги кўрсатилган. Ушбу ҳолат бўлиб ўтган суд жараёнида далил-исботини топиб, қонунбузарларга нисбатан тегишли жазо тайинланган.
МИБ Уйчи туман бўлими иш юритувига келиб тушган мазкур ҳужжат ижросини таъминлаш мақсадида тадбир ташкил этилди. Тегишли мутахассислар иштирокида маҳсулот яна бир бор саноқдан ўтказилиб, Уйчи туманидаги марказий чиқиндихонада белгиланган тартибда йўқ қилинди ва амалда ижро ҳужжати тамомланди.
Изоҳ (0)