Туркия Қора денгиз соҳиллари яқинида газ қувури ётқизишни бошламоқда. Бу ҳақда мамлакат президенти Ражаб Тоййиб Эрдўғон маълум қилди.
Қора денгизда газ қазиб олишнинг шундай муҳим босқичига етганимиздан жуда мамнунмиз. 2023 йилнинг биринчи чорагида миллий газ узатиш тизимимизга 10 млн куб метр газ киради, — деди Эрдўғон.
Унинг сўзларига кўра, 2023 йилнинг биринчи чорагида Туркия Қора денгиздаги янги кондан 10 млн куб метрга яқин газ қазиб олинади. Режага кўра, ишлаб чиқариш 2026 йилгача энг юқори чўққига чиқиши керак.
Қора денгиз шелфидаги газ қазиб олинадиган Sakarya кони Туркия томонидан 2020 йилда кашф этилган бўлиб, у бутун минтақадаги энг йирик кон ҳисобланади. Расмийлар унинг захирасини 540 млрд куб метр деб баҳоламоқда.
Туркия энергетика вазири Фотиҳ Дўнмезнинг таъкидлашича, қазиб олиш бошланишидан олдин ишчилар ўнта қудуқни ишга туширади. Дастлаб улар кондан кунига 10 млн кубометрга яқин, уч-тўрт йилдан кейин эса 40 млн кубометр газ ишлаб чиқаришни режалаштирган.
39 километр узунликдаги газ қувурининг қуруқликдаги қисмининг қурилиш жараёни 2022 йилнинг ноябрь ойида якунланиши кутилмоқда. Унинг умумий узунлиги 211 километрни ташкил этади, шундан 170 километрга яқини сув остида ётқизилади.
Эрдўғонга кўра, газ қувури орқали етказиб бериш 2023 йилдан кечиктирмай бошланади. Собиқ бош вазир Бинали Йилдирим, Сакариянинг газ захиралари мамлакатга 45 йилга етишини даъво қилди.
Аввалроқ Эрдўғон Путин ва Зеленский билан «дон йўлаги» яратишни муҳокама қилиши ҳақида хабар берилганди.
Изоҳ (0)