Жаҳонда олтин нархи тушиб бормоқда

Олтин нархи АҚШдаги инфляция маълумотлари туфайли ойлик энг юқори кўрсаткичдан тушди. Бу ҳақда Reuters хабар берди.

Кўпинча иқтисодий инқирозлар пайтида хавфсиз актив сифатида қабул қилинган олтин аввалги сессияда 9 майдан бери энг юқори кўрсаткичга етиб, унция учун 1 877,05 долларни ташкил қилганди.

Май ойида АҚШда истеъмол нархлари кўтарилди, бу мамлакат марказий банки инфляцияга қарши курашиш учун сентябргача фоиз ставкаларини 50 базавий пунктга ошириши мумкинлигини кўрсатмоқда.

Бу ҳафта марказий банклар учун оғир бўлади, чунки АҚШ Федерал резерв тизими инфляцияни назорат остига олиш учун ставкани кетма-кет иккинчи ярим балл ошириши кутилмоқда.

Бундан ташқари, кумуш 1,5 фоизга тушиб, унцияси 21,55 долларга, платина 2,5 фоизга тушиб, 948,71 долларга ва палладий 1,9 фоизга тушиб, 1 897,49 долларга етди.

Аввалроқ апрель ойида Ўзбекистон энг кўп олтин сотиб олган давлат бўлгани ҳақида хабар берилганди.