Муҳаммад Салоҳ асосий мақсади нима эканлигини айтди

«Ливерпуль» ҳужумчиси Муҳаммад Салоҳ «Олтин тўп»ни қўлга киритиш асосий мақсади эканлигини айтди.

«Дунёнинг энг яхши футболчиси сифатида тан олинишни хоҳлаётганимни инкор этмайман. «Олтин тўп» эса мақсадларим рўйхатида биринчи ўринда туради.

Агар уни қўлга киритсам, иккинчисига интиламан. Менга мотивация берадиган мураббий ёки бошқа биров керак эмас. 2021 йилги ўрнимдан ҳайратда қолганим рост (ўшанда у рўйхатда 7-ўринни эгаллаганди.)

Чемпионлар Лигаси финалида яхши ўйнаган бўлсам ҳам, «Реал»га қарши баҳсдаги мағлубият, албатта, совринни қўлга киритиш имкониятини пасайтиради. Аммо бу сўнгги ойлардаги ўйинимни инкор эта олмайди. Ҳакамлар ҳайъатининг овозини кутамиз. Агар 2022 йилда «Олтин тўп»ни қўлга кирита олмасам, кейингисига эга чиқиш учун бор кучимни ишга соламан.

Мисрликнинг бундай мукофотни олиши Яқин Шарқ ва Африкада катта аҳамиятга эга бўлади. Бу мамлакатлардаги юз миллионлаб одамлар ғайриоддий нарсаларни қила олишлари мумкинлигини тушунади. Мисрнинг бир қишлоғидан чиқиб, кўп нарсага эришдим. Мисрга «Олтин тўп» билан келсам, ватандошларим қандай муносабатда бўлишини тасаввур қиляпман», — дейди Салоҳ.

Маълумот учун, Салоҳ 2021/22 йилги мавсумда барча мусобақаларда 51 ўйинда майдонга тушиб, 31 та гол ва 16 та голга муаллифлик қилди.