Марказий банк жисмоний шахсларнинг валюта операцияларига доир маълумотларни тақдим этди.
2022 йил январь—май ойларида ўзбекистонликлар банкларга жами 4,32 млрд доллар миқдорда хорижий валюта сотди. Бу ўтган йилнинг мос даврига нисбатан 59 фоизга (1,6 млрд доллар) кўп дегани.
Банклар орқали аҳолига жами 2,84 млрд долларлик хорижий валюта сотилган. Бу 2021 йилнинг мос даврига нисбатан 70 фоизга (1,17 млрд доллар) кўп хорижий валюта сотилди.
Аввалроқ Россия рублининг ўзбек сўмига нисбатан сотиш ва сотиб олиш курси тижорат банклари томонидан мустақил равишда жорий халқаро котировкаларга асосан белгиланиб, кун давомида заруриятга кўра ўзгартириб борилиши мумкинлиги тўғрисида хабар берилганди.
Марказий банк таъкидлашича, Ўзбекистонда жисмоний шахслар томонидан хорижий валютани (нақд ва нақдсиз шаклда) олиб кириш ва олиб чиқиш бўйича махсус тартиб ўрнатилган бўлиб, ушбу тартиб ички валюта бозорига кескин таъсир кўрсатиши мумкин бўлган миқдорларда пул оқимларининг вужудга келишига йўл қўймайди.
Марказий банк мавжуд вазиятни доимий онлайн равишда кузатиб бораётгани ва зарур ҳолларда аҳоли манфаатларини ҳамда миллий валюта ва банк тизими барқарорлигини таъминлаш бўйича қўшимча чоралар кўрилишини маълум қилган эди.
Изоҳ (0)