Марказий банк миллий валюта — сўм рамзини ишлаб чиқиш бўйича икки босқичда ўтказилган танлов натижаларини эълон қилди.
Саралаш босқичи танлов ташкилий қўмитаси томонидан ўтказилди ва қуйидагиларни ўз ичига олди:
Дастлабки саралаш – ҳар бир танлов лойиҳасини техник талабларга мувофиқлигини кўриб чиқиш.
Натижада 508 та ижодий лойиҳа танлаб олинди ва уларнинг ҳар бирига махфийликни таъминлаш мақсадида индивидуал шифр рақамлари берилди.
Техник экспертиза – шифрланган ижодий лойиҳалар танлов мезонларига мувофиқлиги бўйича текширилди. 54 та шифрланган ижодий лойиҳалар эса танлов ҳакамлар ҳайъатига кўриб чиқиш учун тақдим этилди.
Танловнинг якуний босқичида шифрланган лойиҳалар Марказий банк, Камолиддин Беҳзод номидаги Миллий рассомлик ва дизайн институти ҳамда Интеллектуал мулк агентлиги вакиллари томонидан баҳоланди.
Ҳакамлар ҳайъати аъзолари танлов ишларини қуйидаги мезонларга мувофиқ баҳолади:
- ўзига хослик (уникал) ва оригиналлик;
- универсаллик;
- осон таниб олиниши;
- рамзий ва фарқли жиҳатлари;
- сўм рамзининг турли форматларда график қўлланилишининг қулайлиги.
Танлов натижаларига кўра, ҳайъат томонидан Ўзбекистон миллий валютаси – сўмнинг ўзига хос тимсолини ёрқин ифода этган энг креатив лойиҳа сифатида Жумагалдиев Сарвар томонидан ишлаб чиқилган график белги танлаб олинди.
Кенг жамоатчиликни пул бирлиги рамзини яратишга жалб қилиш мақсадида Марказий банк томонидан Миллий валюта — сўм рамзини ишлаб чиқиш бўйича танлов жорий йилнинг 8 февралидан 31 мартига қадар ўтказилди. Жорий йилнинг 1 апрель ҳолатига миллий валюта рамзини ишлаб чиқиш бўйича ўтказилган танловга юборилган аризаларнинг умумий сони 17 мингдан ортиқни ташкил этди.
Изоҳ (0)