БМТ Хавфсизлик кенгаши КХДРга қарши санкцияларни кучайтириш тўғрисидаги резолюция лойиҳасини қабул қила олмади. Хавфсизлик кенгаши доимий аъзолари Россия ва Хитой вето ҳуқуқидан фойдаланди, қолган мамлакатлар эса уни ёқлаб овоз берди, деб ёзади «РБК».
Резолюция қабул қилиниши учун тўққизта овоз ва доимий аъзолар томонидан вето бўлмаслиги талаб этилади. Хавфсизлик кенгашининг доимий аъзолари Россия ва Хитойдан ташқари, АҚШ, Франция ва Буюк Британиядан иборат.
Лойиҳа АҚШ томонидан КХДР томонидан учирилган баллистик ракеталарга жавобан тайёрланган бўлиб, у Шимолий Кореяга нефть ва нефть маҳсулотлари экспортининг рухсат этилган ҳажмини қисқартиришга қаратилган эди. Вашингтон, шунингдек, Пхеньянга минерал ёнилғи ва ёғ экспортини тақиқлашни таклиф қилганди.
Россиянинг БМТ ҳузуридаги доимий вакили Василий Небензя ўзи берган қарши овозни изоҳлар экан, Вашингтон Москванинг мулоҳазаларини ҳисобга олмаганини айтди. «Америкалик ҳамкасбларимиз лойиҳа бўйича маслаҳатлашувлар чоғида берган фикр-мулоҳазаларимизни эътиборсиз қолдирганидан афсусдамиз», — деди у. Дипломатнинг фикрича, КХДРга қарши санкцияларни кенгайтириш «истиқболсиз бўлиш билан бирга, бундай чоралар оқибатлари нуқтаи назаридан ўта хавфли ҳамдир». Унинг айтишича, 2016—2017 йилларда қабул қилинган чекловлар «биринчи навбатда оддий шимолий кореяликлар ҳаётига зарба берган».
«АҚШ томонидан таклиф этилган резолюция қандайдир муаммоларни ҳал қила олади, деб ўйламаймиз», — дея маълум қилди БМТдаги Хитой доимий ваколатхонаси Reuters’га. Хитойлик дипломатлар фикрича, Вашингтон Пхеньян билан муносабатларда ўзгаришга эришмоқчи бўлса, «кўпроқ самимийлик ва мослашувчанлик»ни намоён қилиши керак.
Эслатиб ўтамиз, АҚШ президенти Жо Байденнинг Сеул ва Токиога ташрифи ҳамда Quad саммити (Австралия, АҚШ, Ҳиндистон ва Япония иштирокидаги хавфсизлик бўйича тўрт томонлама мулоқот)дан кейин КХДР Япон денгизига қарата учта ракета учирган эди. Япония буни Шимолий Корея томонидан очиқ-ойдин провокация деб атади.
Жанубий Корея ҳарбийлари КХДРнинг ушбу хатти-ҳаракатларига жавобан, «Хенму-2» баллистик ракеталарини учирди, АҚШ эса Япон денгизига қарата битта ATACMS снарядини учирди. Шу тариқа иттифоқчилар иттифоқ кучлари томонидан «зудлик билан зарба берилиши» имкониятларини кўз-кўз қилган.
Шундан кейин АҚШ БМТ Хавфсизлик кенгашига баллистик ракеталар парвози учун Шимолий Кореяга нисбатан санкцияларни кучайтиришни кўзда тутувчи резолюция лойиҳасини киритган эди.
Изоҳ (0)