Шри-Ланкада иқтисодий инқироз фонида мактаблар ёпилди

Чуқур иқтисодий инқироз давом этаётган Шри-Ланкада ёнилғи танқислиги туфайли 20 май, жума куни барча ўқув муассасалари ёпилди, деб хабар беради Anadolu Agency.

«Ёнилғи етишмаслиги ва транспорт воситалари билан боғлиқ муаммолар туфайли» ҳукумат асосий хизматларни кўрсатувчилардан ташқари барча давлат хизматчиларига ҳам вақтинчалик ишга чиқмасликни буюрди.

Бутун мамлакат бўйлаб минглаб транспорт воситалари бир неча кундан буён автомобилга ёнилғи қуйиш шохобчаларида узун навбатларга тизилган.

Ҳукумат ўткир ёнилғи танқислиги даврига тайёрланишга уринмоқда, у бир неча кун давом этиши кутилмоқда.

Ҳозирги вақтда Шри-Ланкада бензин деярли қолмаган, шунингдек, бошқа ёнилғи турлари, импорт озиқ-овқат маҳсулотлари ва дорилар етишмовчилиги ҳам кузатилмоқда.

Аввалроқ Шри-Ланка биринчи марта ташқи қарз бўйича мажбуриятларини бажара олмай, дефолт ҳолатини эълон қилди.

Орол давлат Марказий банки раҳбари Нандалал Вирасингхе хорижий валютанинг жисмоний шахслар қўлида бўлишига рухсат этилган суммаси 15 мингдан 10 минг долларгача пасайтирилишини эълон қилди.

Шри-Ланка бош вазири Ранил Викрамасингхе оғир иқтисодий инқироз фонида мамлакатда озиқ-овқат танқислиги юзага келиши эҳтимоли ҳақида огоҳлантирди. Шунингдек, у ҳукумат озиқ-овқат хавфсизлигини таъминлаш бўйича саъй-ҳаракатларни амалга ошираётганини маълум қилди.

«АҚШ глобал озиқ-овқат танқислигини прогноз қилди ҳамда Шри-Ланка ва Афғонистон ундан қаттиқ жабр кўришини қайд этди», — деб ёзди Викрамасингхе ўз Twitter’ида.

Ўтган ҳафта тартибсизликлар билан бирга кечган норозилик намойишлари фонида ҳукуматнинг аввалги раҳбари, президент Готабая Ражапаксанинг акаси Махинда Ражапакса истеъфога чиқди. Аммо намойишчилар акцияларни якунламади, улар, хусусан, президент истеъфосини ҳам талаб қилмоқда.

Шри-Ланкадаги норозиликлар бир неча ойлардан буён давом этмоқда. Сўнгги кунларда уларга тартибсизликлар, ўт қўйишлар ҳамроҳлик қилди. Саккиз киши ҳалок бўлди, 200 дан ортиқ одам жабрланди, ўт қўйилиши оқибатида 60 та транспорт воситаси ва юздан ортиқ бинолар йўқ қилинди.

Шри-Ланка 1948 йил — Буюк Британиядан мустақил бўлиб ажралиб чиққанидан буён энг жиддий инқирозни бошидан кечирмоқда.