ФИФА ЖЧ—2022 га жалб этилган ҳакамлар рўйхатини маълум қилди. Ўзбекистон вакиллари 12 йил деганда илк бор мундиалда ишламайди

ФИФА Қатар майдонларида ўтадиган ЖЧ—2022 учун жалб этилган ҳакамлар рўйхатини эълон қилди.

Рўйхатдан 36 нафар бош ҳакам, 69 ассистент ва 24 нафар VAR ҳаками жой олган. Улар орасида Ўзбекистон вакиллари йўқ, бунақаси 2010 йилги мундиалдан кейин илк бор кузатилди.

Мусобақа тарихида илк бор аёл ҳакамлар ҳам чақирилган. Бош ҳакамлардан Стефани Фраппар (Франция), Салима Мукансанга (Руанда) ва Ёшими Ямашита (Япония) олинган бўлса, Неуза Бек (Бразилия), Карен Диас Медина (Мексика) ва Кетрин Несбитт (АҚШ) ассистент вазифасига чақирилган.

ЖЧ—2022 да Англия (Энтони Тэйлор ва Майкл Оливер), Аргентина (Факундо Тельо ва Фернандо Рапаллини) ва Бразилиядан (Рафаэл Клаус ва Уилтон Сампаё) икки нафардан бош ҳакам жалб этилган. Шунингдек, Матеу Лаос (Испания), Даниэле Орсато (Италия), Даниэль Зиберт (Германия), Данни Маккелли (Нидерландия), Клемен Тюрпен (Франция) ва Шимон Марчиняк (Польша) каби машҳур ҳакамлар ҳам Қатар майдонларида ҳаракат қилади.

Тўлиқ рўйхат билан бу ерда танишиш мумкин.