Ижтимоий тармоқларда Қашқадарё вилоятининг Деҳқонобод туманидаги қишлоқларнинг бирига сел келгани тасвирланган видеолар тарқалди. Вилоят ФВБ мазкур ҳолатга муносабат билдириб, сел оқибатида ҳеч кимга зиён етмаганини маълум қилди.
Маълум қилинишича, 19 май куни соат тахминан 14:30—15:00 лар атрофида Деҳқонобод тумани марказидан 45-50 километр узоқликдаги тоғли ҳудудларда қисқа муддатли ёғингарчилик кузатилган.
Ёғингарчилик оқибатида ҳосил бўлган ёмғир сувлари «Оқрабод» МФЙ Наймансой қишлоғи адирликлари ёнбағрида жойлашган айрим хонадонларнинг томорқалари ва ҳовлиларидан оқиб ўтиб, «Катта пай» ўрмон хўжалиги далаларига бориб қуйилган.
«Ушбу ҳолат бўйича туман ФВБ ва маҳалла фаоллари биргаликда аҳоли яшаш хонадонларига бориб, ёмғир сувлари уйларнинг хоналарига тошиши (кириши) ҳолатлари кузатилмагани ҳамда ҳеч кимга зиён етмагани аниқланди», — дейилади хабарда.
Эслатиб ўтамиз, 17 май куни «Ўзгидромет» бош директори Шерзод Ҳабибуллаев ўзининг Facebook’даги саҳифаси орқали 18–23 май кунлари кутилаётган кучли ёғингарчиликлар сабаб республиканинг тоғолди ва тоғли ҳудудларида сел хавфи юзага келиши мумкинлигидан огоҳлантирганди.
Изоҳ (0)