НАТО бош котиби Йенс Столтенберг 18 май куни Брюсселда Финляндия ва Швеция элчиларидан ушбу мамлакатларнинг альянсга аъзо бўлиш ҳақидаги аризаларини қабул қилиб олди, деб ёзади Meduza.
Иккала мамлакат ҳам Россиянинг Украинага бостириб кириши фонида бетарафлик мақомидан воз кечиб, ҳарбий альянсга қўшилишга қарор қилди.
17 май куни Швециянинг НАТОга кириш ҳақидаги аризасини мамлакат ташқи ишлар вазири Анн Линде имзолади. Шу куниёқ Финляндия парламенти альянсга қўшилиш ҳақидаги қарорни 188 та розилик ва саккизта қаршилик овози билан маъқуллади.
Аризалар НАТО кенгаши томонидан кўриб чиқилади, шундан кейин Швеция ва Финляндиянинг альянсга аъзо бўлиши ҳақидаги битим унга аъзо 30 та давлат томонидан ратификация қилиниши керак бўлади.
Туркия ҳукумати Швеция ва Финляндиянинг НАТОга қўшилишига розилик бериш учун ўз шартларини эълон қилди. Хусусан, икки мамлакат Курдистон ишчилар партиясини ва унга алоқадор тузилмаларни террорчилик ташкилоти деб тан олишини талаб қилмоқда. Шунингдек, Туркия F-16 қирувчи самолётларининг янги партиясини қўлга киритишга ҳамда яна F-35 қирувчиларини етказиб бериш дастурига киришга умид қилмоқда.
Мавзуга доир:
- «Туркия Швеция ва Финляндиянинг НАТОга киришини маъқулламайди, уларнинг дипломатлари бизни ишонтиришга уринмаса ҳам бўлади» — Ражаб Тоййиб Эрдўғон
- Швеция ва Финляндия НАТОга қўшилиш қарори ҳақида расман эълон қилди
- Финляндия Россия томонидан хавф кўрмаяпти, НАТОга қўшилиш истаги хавфсизлик соҳасидаги ўзгаришлар туфайлидир
Изоҳ (0)