Ўзбекистоннинг бир қатор вилоятларида вирусли инфекциялар тарқалишига қарши курашиш бўйича даволаш-профилактик ишлар амалга оширилади. Бу ҳақда Соғлиқни сақлаш вазирлиги хабар қилди.
Қайд этилишича, президентнинг «Айрим долзарб вирусли инфекциялар тарқалишига қарши курашиш чора-тадбирларини такомиллаштириш тўғрисида»ги қарори қабул қилинган. Ҳужжатга асосан:
- ССВ 2022 йил 1 ноябрга қадар «IT-Med» МЧЖ томонидан жигар сурункали вирусли касаллигининг ягона электрон реестрини ишлаб чиқиб, келгусида унинг техник ва дастурий қўллаб-қувватланишини таъминлайди;
- 2023 йил 1 январга қадар реестрни юритишни қон ва унинг таркибий қисмлари билан ишлайдиган ходимларга эга бўлган даволаш-профилактика муассасалари, санитария-эпидемиология хизмати ҳамда мулкчилик шаклидан қатъи назар барча тиббиёт ташкилотларига жорий қилиб, уларнинг ўзаро интеграцияси йўлга қўйилади;
- 2022 йил 1 июлдан бошлаб Вирусология илмий-тадқиқот институтида ҳамда вазирлик томонидан белгиланадиган Қорақалпоғистон, Навоий, Бухоро, Қашқадарё, Сурхондарё, Жиззах ва Сирдарё вилоятларидаги тегишли муассасаларда Қрим-Конго геморрагик иситмаси билан касалланиб тузалганларнинг (донорларнинг) қон плазмаси банки яратилиши таъминланади;
- даволаш-профилактика муассасалари ва нодавлат тиббиёт ташкилотларида юқумли касалликларга, шу жумладан, сурункали вирусли гепатитларга ташхис қўйиш ва уларни даволаш стандартларини такомиллаштиради ҳамда уларга риоя қилиниши устидан назорат кучайтирилади.
2024 йил 1 январдан бошлаб нодавлат тиббиёт ташкилотларида қон ва унинг таркибий қисмлари билан ишлаётган ходимлар гепатит B инфекциясига қарши эмланган бўлиши ҳамда реестрнинг белгиланган тартибда юритилиши тиббий фаолиятни лицензиялаш талаблари ва шартларидан бири ҳисобланади.
Мавзуга доир:
Изоҳ (0)