Майкл Жексондан ажойиб дебют, Роналдуда рекорд. АПЛда апрель ойининг энг яхшилари аниқланди

Англия Премьер Лигаси апрель ойининг энг яхшилари номини маълум қилди.

«Бёрнли» бош мураббийи вазифасини бажарувчи Майкл Жексон Англия Премьер Лигасининг апрель ойидаги энг яхши мураббийи деб топилди. Мутахассис қўл остида жамоа 3 ғалаба ва битта дуранг натижа қайд этди.

Жексондан ташқари энг яхши мураббий бўлиш учун Пеп Гвардиола («Манчестер Сити»), Томас Франк («Брентфорд») ва Юрген Клопп («Ливерпуль») кураш олиб борганди.

Эслатиб ўтамиз, март ойида «Арсенал» устози Микель Артета энг яхши деб топилганди.

«Манчестер Юнайтед» ҳужумчиси Криштиану Роналду эса апрель якунларига кўра, ойнинг энг яхши футболчиси деб топилди. 37 ёшли ҳужумчи апрель ойида 4 та ўйинда 5 та голга муаллифлик қилди.

«Қизил иблислар» футболчиси ўз фаолиятида 6 марта ушбу совринга эга чиқмоқда ва бу борада Уэйн Рунини (5 марта) ортда қолдириб, клуб рекордини қайд этди. Премьер Лига тарихида энг кўп ой футболчиси номига сазовор бўлган футболчилар Ҳарри Кейн («Тоттенҳэм») ва Серхио Агуэро («Манчестер Сити») ҳисобланади. Ҳар иккала ҳужумчи 7 мартадан ушбу совринга лойиқ кўрилган.

Роналдудан ташқари ушбу соврин учун Натан Коллинс («Бёрнли»), Кевин де Брюйне («Манчестер Сити»), Бруно Гимараэс («Ньюкасл»), Габриэль Жезус («Манчестер Сити»), Сон Ҳён Мин («Тоттенҳэм»), Тиаго Алькантара («Ливерпуль»), Леандро Троссард («Брайтон») каби футболчилар даъвогар эди.

Март ойида «Тоттенҳэм» ҳужумчиси Ҳарри Кейн энг яхши футболчи деб топилганди.