«Беном» — Сарвар ва Комил янги дастурдаги камчиликлар, Заҳида билан дуэт, «ўхшамаган» концертлари ҳақида (видео)

3–5 май кунлари «Халқлар дўстлиги» санъат саройида «Беном» гуруҳининг «Яна бу биз» номли концерт дастури бўлиб ўтди. «Дарё» мухбирлари концертдан сўнг гуруҳ йигитлари билан суҳбатда бўлди.

— Концертнинг илк куни камчиликлар жуда кўп бўлди. Ҳаттоки мухлисларни залга киритишаётган пайтда ҳам техникаларни созлаш билан овора эдик. Концерт давомида қулоқчинларда овозни эшитиш билан боғлиқ муаммолар Комил иккимизга ноқулайлик туғдирди. Шу боис биринчи кундаги концертдан умуман кўнглимиз тўлмади. Аммо мухлислар ҳаяжонланаётганимизга қарамай, бизни қўллаб-қувватлашди, — дейди гуруҳ аъзоси Сарвар.

— Гуруҳимизда етакчи деган тушунча йўқ. Иккимиз ҳам қарорларни келишган ҳолда чиқарамиз. Саҳнада мен эшитишни, Сарвар эса гапиришни яхши кўради. Ҳаётда эса бунинг акси, — дейди Комил.

Шу кунгача Лола билан дуэт куйлаган гуруҳ нега бу гал дуэтдошликка Заҳидани танлади? Бу савол кўпчиликни ўйлантириши аниқ. Боиси ёш гуруҳлар дуэт куйлашга машҳур хонандаларни танлашади. «Беном» эса ҳали у қадар ярқ этиб кўзга ташланмаган ёш ижодкор билан қўшиқ куйлашни маъқул кўрди.

— «Чунки бу биз» концерт дастурини республикамизнинг барча вилоятларида намойиш этдик. Дастур тўлиқ ижрода куйлангани учун Заҳиданинг созандалари билан ҳамкорлик қилдик. Шунда Заҳида билан дуэт куйлаш фикри туғилди. Заҳида ёш бўлишига қарамай, истеъдодли ижодкор, — дейди «Беном» гуруҳи аъзоси Сарвар.

— Ҳар доим ҳам концертлар кутилганидек бўлмаслиги мумкин. Шу кунга қадар «Беном» йигитларининг ҳам «ўхшамай» қолган концертлари борми?

— Бундай концертимиз Хоразм вилоятида бўлган. Ижодий гуруҳ билан автобусларга ўтириб, концертга борганмиз. Аммо концерт берилиши керак бўлган кун қаттиқ ёмғир ёғган. Техникаларни ёмғирли ҳавода ишлатолмасдик, бундай шароит томошабинларга ҳам ноқулайлик туғдирарди. Шу боис концертни қолдиришга мажбур бўлганмиз. Эртаси куни эса ҳаво очилиб кетган. Концерт берайлик деганимизда вилоят ҳокимлиги ва мансабдор шахслар рад жавобини беришган. Балки бир кунда ҳужжатларни тўғрилашга ва одамлар хавфсизлигини таъминлашга улгуришолмагани билан боғлиқдир. Аммо мухлислар биздан ранжишган. «Беном» концертга келмади деб ҳисоблашган. Аслида эса биз 1200 км йўл босиб, концерт бермай ортимизга қайтишга мажбур бўлганмиз, — дейди гуруҳ вакили Сарвар.

«Беном» гуруҳининг янги концертини қуйида тўлиқ томоша қилишингиз мумкин: