Қамчиқ довонида кузатилган сел-тошқин оқибатлари бартараф этилди, деб хабар беради ФВВ матбуот хизмати.
Маълум қилинишича, 4 май куни соат 21:30 ларда Қамчиқ довонида кузатилган кучли ёғингарчилик оқибатида Ангрен—Поп электрлаштирилган темир йўлининг 19-километри «Кўл» станциясига олиб борувчи автомобиль йўлининг ювилиши оқибатида поездни электр қуввати билан таъминловчи таянч устуни қулаган.
Юзага келган вазият оқибатларини бартараф этиш мақсадида тезкор штаб тузилиб, Қамчиқ МҚЁҚБ ва «Ўзбекистон темир йўллари» АЖ махсус авария-тиклаш бригадаси ва муҳандислик техникалари билан йўлда таъмирлаш ишлари олиб борилиб, электр таянч устуни ҳамда йўл остидан қўшимча сел ўтказгич қуриш ишлари амалга оширилган.
Шунингдек, автомобиль йўлида сел, тошқин оқибатларини бартараф этиш ва ёғингарчилик сувларини беталофат ўтказиб юбориш мақсадида сув ўтказиш иншоотларини ва кюветларни тозалаш тадбирлари олиб борилган. Довон ҳудудида ҳодиса оқибатларини бартараф этиш тадбирлари давом этмоқда.
Аввалроқ Сурхондарёда 40 га яқин хонадонни сел босиб, 230 дан ортиқ киши эвакуация қилингани, Сирдарёда сув тошқини оқибатида 2 та кўп қаватли уй бутунлай яроқсиз ҳолга келгани, Жиззахда сел оқимида қолиб кетган икки фуқаро ички ишлар ходимлари томонидан қутқарилгани тўғрисида хабар берилганди.
Изоҳ (0)