Ҳар бир уйдан топиш мумкин бўлган маҳсулотлардан 3 та самарали соч ниқоби

Гўзаллик салонидаги қиммат маҳсулотларни уй шароитида оддийларига муносиб равишда алмаштириш мумкин. Уларнинг аксарияти, албатта, ошхонангизда бўлади. «Lisa.ru» нашри ҳар бир уйда мавжуд бўлган маҳсулотлар ёрдамида сочга ниқоб тайёрлаш бўйича кўрсатмалар тақдим этди.

Намлаш, озиқлантириш, ўсишни рағбатлантириш, жингалакларни мустаҳкамлаш ёки аксинча, текислаш — бу натижаларга эришиш доимо ҳал қилиниши керак бўлган муаммоларнинг кичик бир қисмидир. Хоҳлайсизми ёки йўқ, лекин кондиционер ҳеч қачон ниқобнинг ўрнини босмайди, ҳатто уни белгиланган уч-беш дақиқадан кўпроқ ушлаб турсангиз ҳам. Самарали ниқоблар муносиб пул талаб қилади, парвариш эса доимий равишда кун тартибида бўладиган масала. Дарҳақиқат, оддий маҳсулотлардан фойдаланган ҳолда тайёрланган ниқоблар кўп муаммоларни самарали ҳал қилиши мумкин.

Ёғли сочлар учун сули ниқоби

Сули ёрмаси бош териси тешикларини самарали тозалайди, соч ўсишига ёрдам беради, кепакни кетказади ва қичишишни тўхтатади. Ушбу оддий маҳсулотдан фойдаланган ҳолда соч ниқоблари ҳам гуллаш ва шикастланган сочларнинг олдини олишга ёрдам беради. Бундай табиий сули ниқоби билан сочларни парвариш қилишдан осонроғи йўқ.

Рецепт:

• сут — 1/8 чашка
• бодом ёғи — 1 чой қошиқ 
• сули — 1/4 чашка

Маҳсулотларни блендерга солиб, хамир ҳосил бўлгунча аралаштирилади. Аралашманинг фойдали элементларни табиий равишда чиқариши учун у бош териси ва сочларга 15-30 дақиқа давомида қўлланади. Сочни илиқ сув билан ювиб, таърифлаб бўлмайдиган майинлик ва покликни ҳис қилиш мумкин.

Соч учун авокадоли ниқоб

Авокадони қадрлаш учун яна бир сабаб қўшилди, унинг фойдали хусусиятлари ва мазасидаги кенг имкониятлардан ташқари, албатта. Табиий ёғлар ва ёғ кислоталари манбаи сифатида авокадодан фойдаланадиган жуда оддий ниқоб сочларни илдиздан учигача озиқлантиришга ёрдам беради. Шунингдек, у нормал соч ўсиши учун зарур бўлган жуда кўп биотинни ўз ичига олади.

Рецепт:

• авокадо — 1 дона;
• йогурт — 1 стакан;
• зайтун ёғи — 2 ош қошиқ.

Мева бўлаклар қолмагунча майдаланади, сўнгра йогурт ва ёғ қўшиб, ниқоб ҳосил қилинади. Аралашма соч ва бош терисига қўлланади ва энг яхши натижага эришиш учун 30 дақиқага қолдирилади. Жараён тугагач, ниқоб қолдиқларини олиб ташлаш учун сочларни шампунь ва кондиционер билан ювиш мумкин.

Юмшоқ ва порлоқ сочлар учун кокос мойи ниқоби

Кокос ёғидан фойдаланиш шикастланган сочлар, айниқса қуруқ ва жингалак бўлса, қутқарувчи ҳисобланади. Бу ёғ табиий текисловчи бўлиб, соч ва бош терисини шикастланишдан самарали ҳимоя қилади. Терини озиқлантириб, синишини камайтирадиган ёғ табиий равишда соч тўкилишига қарши курашади, уларни юмшоқ ва порлоқ қилади. Агар кутилаётган натижалардан ҳайратда қолишни истасангиз, унда фақат учта маҳсулот керак бўлади.

Рецепт:

• кокос мойи — 2 ош қошиқ;
• асал — 2 ош қошиқ;
• олма сиркаси — 1 ош қошиқ.

Кокос ёғи ва асални микротўлқинли печда бир хил идишда эритиб олинади. Сирка қўшиб, аралаштирилади. Аралашма совигач, сочларга қўлланади ва 20 дақиқага қолдирилади. Ниқобни қўллашдан олдин сочни намлашнинг ҳожати йўқ. Ниқобни олиб ташлаш учун сочларни шампунь билан ювиш кифоя.