Жиззах вилоятининг Фориш туманидаги Эгизбулоқ қишлоғи аҳолиси учун янги турар жойлар ва қўшимча иш ўринлари яратилади. Бу ҳақда «Дарё»га вилоят Фавқулодда вазиятлар бошқармаси ахборот хизмати раҳбари Фаррух Абдураҳмонов хабар берди.
Маҳалладаги ҳоким ёрдамчиси Музаффар Қозоқовнинг аниқлаштиришича, ҳудудда селдан зарар кўрган хонадонлар 114 та экани маълум бўлган. Ва шу хонадонларнинг тиклаб бўлмас даражага келган 53 таси ўрнида шунча миқдорда янги уй қуриб берилади.
Вилоят Фавқулодда вазиятлар бошқармаси ахборот хизмати раҳбари Фаррух Абдураҳмоновнинг айтишича, сел ювиб кетган уйлар ўрнидаги сойдан узунлиги 4 км бўлган эни 25 метрлик селга қарши иншоот (канал) қурилиши режалаштирилган.
Масъулнинг қўшимча қилишича, ҳудудга борган фавқулодда вазиятлар вазири генерал майор Абдулла Қўлдошев ҳамда вилоят ҳокими Эргаш Солиевга мутахассисларнинг ўрганиш натижалари маълум қилиниб, таклифлар ўртага ташланган.
«Қувонарлиси, ҳудуд аҳолиси учун янги уй-жой, иш ўринлари яратилар экан, коммунал, ижтимоий соҳа ривожлантирилади. Бу эса эгизбулоқликлар учун катта ёрдам бўлади», — дейди Фаррух Абдураҳмонов.
Эслатиб ўтамиз, ҳудуддаги сел сабаб катта талафот кўрган 53 та хонадон вакиллари ҳамда уйи таъмирга муҳтож 25 та хонадон аҳолиси хавфсиз жойга кўчирилган.
Мавзуга доир:
- «Қўшнимизнинг дарвозаси олдидан бир ўлик чиқди — ёшгина қиз экан». Форишликлар Эгизбулоқдаги сел оқибатлари ҳақида
- «Болам қани, тирикми? Қайнотамга берган биринчи саволим шу бўлди». Форишдаги селда боласи 100 метр масофага оқиб борган аёл ҳикояси
- «Саксон йилда такрорланган сел 12 дақиқада қишлоқ тақдирини ҳал қилди, бир оиланинг уч нафар вакили ўлимига сабабчи бўлди». Форишда келган сел ва унинг оқибатлари ҳақида
Изоҳ (0)