Хитойнинг Xiaomi компанияси «ақлли» эшик лойиҳасини ишга тушириш учун краудфандинг майдончада маблағ йиғмоқда, деб хабар беради Hi-Tech.Mail.ru. Айни вақтда эшикнинг намуналари ва номи — Xiaobai Blade Star мавжуд. Қурилмани очишнинг қўшимча усули — бармоқ изи сканери, пароль ёки NFC. Шунингдек, унда иккита дисплей мавжуд: 5 дюймли ташқи ва 10,1 дюймли ички.
Бутун тизим саккиз ядроли MadiaTek Kompanio 500 процессори базасида ишлайди. Ишлаб чиқарувчининг таъкидлашича, смарт-эшиклар 1 метргача бўлган масофада юзни бир сониядан камроқ вақт ичида таний олади. Девайс хотирасида бир вақтнинг ўзида 255 тагача юз «сақланади» ва уни танишдаги хатолик эҳтимоли жуда кам.
«Мўъжиза-эшик»ка иккита камера ўрнатилган — тунги кўриш режимли ва оддий. Тўлақонли видеочақирув ва эшик орқали мулоқот учун микрофон ҳам ўрнатилган. Гаджетнинг ишлашига PIR (ҳаракатни аниқловчи пассив инфрақизил датчик) ёрдам беради.
Девайс Xiaomi’нинг «ақлли» экотизимли уйлари билан интеграциялаша олади. Дастурни ўрнатишда эшикни смартфон билан кириш эшигини синхронлаштириш имконияти мавжуд. Агарда уй эгаси эшикни тасодифан очиқ қолдирса ёки уйда йўқлигида кимдир келса, хабарнома келади.
Xiaobai Blade Star қалинлиги 3,5 дюймли темир қатламидан тайёрланган.
«Ақлли» эшик бир неча хил ўлчам ва икки хил рангда тақдим этилади: кул ранг ва жигарранг. Эшикни олдиндан 7999 юань (1250 доллар) эвазига олдиндан буюртма қилиш мумкин. Краудфандинг лойиҳаси якунлангач, унинг нархи 12 999 юанга (2050 доллар) етади.
Аввалроқ Xiaomi ҳарорат ва намликни ўлчашга қодир «ақлли» вентиляторини тақдим этгани тўғрисида хабар берилганди.
Изоҳ (0)