Сўнгги 3 йил ичида умумий қуввати 8 905 МВтга тенг бўлган иссиқлик, қуёш ва шамол электр станцияларини қуриш бўйича халқаро компаниялар билан ҳамкорликда 19 та битим имзоланди. Бу ҳақда 15 апрель куни АОКАда бўлиб ўтган брифингда Энергетика вазирлиги ахборот хизмати раҳбари Элмира Бекмуродова маълум қилди.
Таъкидланишича, ушбу лойиҳаларнинг умумий қиймати 6 миллиард 919 миллион долларни ташкил этиб, уларнинг барчаси хорижий компаниялар томонидан тўғридан-тўғри инвестициялар ҳисобига амалга оширилади.
Қайд этилишича, 2022 йилнинг апрель ойида Самарқанд вилоятининг Нуробод туманида 100 МВт қувватли иккинчи қуёш фотоэлектр станцияси ишга туширилади.
Шунингдек, 2023 йил якунига қадар умумий қуввати 1 197 МВт бўлган 5 та, хусусан, Қорақалпоғистон Республикасининг Қораўзак туманида қуввати 100 МВт бўлган шамол электр станцияси, Сурхондарё вилоятининг Шеробод туманида қуввати 457 МВт, Жиззах вилоятининг Ғаллаорол туманида қуввати 220 МВт, Самарқанд вилоятининг Каттақўрғон туманида қуввати 220 МВт ва Навоий вилоятининг Нурота туманида қуввати 200 МВт бўлган қуёш фотоэлектр станциялари ишга туширилади.
2024 йилда Бухоро вилоятининг Пешку ва Ғиждувон туманларида ҳар бирининг қуввати 500 МВтдан бўлган иккита (жами минг МВт) ва Навоий вилоятининг Томди туманида қуввати 500 МВт бўлган шамол электр станциялари ишга туширилади.
2022 йилнинг ўтган уч ойида учта вилоятда умумий қуввати 1 154 МВт бўлган бешта янги иссиқлик электр станцияси ишга туширилган. Шунингдек, декабрь ойига қадар Сирдарё вилоятининг Ховос туманида қуввати 220 МВт бўлган янги иссиқлик электр станцияси ишга туширилади.
Бундан ташқари, 2023 йил якунига қадар Сирдарё вилоятининг Ширин шаҳрида қуввати 1 500 МВт, 2024 йил якунига бориб эса Сурхондарё вилоятининг Ангор туманида қуввати 1 560 МВт бўлган янги иссиқлик электр станциялари ишга туширилади.
Мазкур ишлар натижасида 2026 йилга бориб Ўзбекистонда умумий қуввати 8 минг МВтга тенг бўлган қуёш ва шамол электр станциялари, 868 МВт қувватга эга гидроэлектр станциялари ҳамда 6 008 МВтга тенг янги иссиқлик электр станциялари ишга туширилади. Натижада Ўзбекистонда ишлаб чиқариш қувватлари 27 минг 400 МВтга етказилади.
Мавзуга доир:
- Ўзбекистонда 2022 йилда 7 та янги электр станцияси ишга туширилади
- Шавкат Мирзиёев Қорақалпоғистонда шамол электр станцияси қурилишига тамал тошини қўйди
- Ўзбекистонда уч ой ичида 3 та янги иссиқлик электр станцияси ишга туширилди
- Шавкат Мирзиёев Сурхондарёдаги янги иссиқлик электр станцияси қурилишига старт берди
Изоҳ (0)