Брюс Уиллис, Кетрин Зета-Жонс: касаллик туфайли карьерасини тўхтатишга мажбур бўлган актёр ва актрисалар (фото)

Агар бу юлдузларнинг соғлиғида муаммо бўлмаганида, уларнинг кинодаги карьераси бошқача бўлиши мумкин эди. Бугуни ва келажагини ўз хоҳишига қарши ўзгартиришга мажбур бўлган актёр ва актрисалар ҳақида маълумот берамиз.

Брюс Уиллис

1990 йилдан бери кино саноатида фаолият олиб борган Брюс Уиллис сўнгги йилларда фақат унчалик маҳоратли бўлмаган жанговар фильмларда рол ўйнади ва ҳатто «Олтин малина» антимукофотига лойиқ кўрилди. Актёрнинг соғлиғи ҳақидаги миш-мишлар тўлқини ва уларни тасдиқловчи расмий баёнотдан сўнг, бу касаллик унинг ишига қанчалик таъсир қилгани маълум бўлди.

67 ёшли Брюс Уиллис фаолиятини якунлаётгани ҳақида бутун оила номидан унинг собиқ рафиқаси Деми Мур 2022 йил 30 март куни эълон қилган эди. Сабаби — афазия, жиддий нутқ бузилиши. Актёрнинг карьераси қайғули якунланган бўлса-да, Брюс Уиллис ижро этган «Армагеддон», «Олтинчи ҳис», «Кичкинтой», «Бешинчи элемент», «Чақилмас ёнғоқ», «Шиша» каби ажойиб фильмлар қолди.

Майкл Ж. Фокс

1991 йилда машҳурликка эришган «Келажакка қайтиб» трилогиясида вақт саёҳатчиси Марти Макфлай ролини ижро этган актёр Паркинсон касаллигига чалинган. У пайтда Майкл атиги 30 ёшда эди. Унинг карьераси бир зумда тугамади. Шундан кейин ҳам муваффақиятли сериал ва фильмларда суратга тушиб, учта «Олтин глобус» мукофотига сазовор бўлди. Аммо борган сари симптомлар кучая бошлади. Шунда ҳам Майкл ҳар сафар касалликка қарши курашишга ўзида куч топа олди — бир неча ўн йиллар давомида у Паркинсон касаллигини ўрганиш учун ҳеч нима аямади: хайрия жамғармасини ташкил қилди, нутқ сўзлади, ҳаётий тажрибаларини ўзи ёзган китобларида ўртоқлашди.

Брендан Фрэйзер

Тўхтовсиз суратга тушиб, саломатлиги ҳақида ўйламаган актёр ахийри ҳолдан тойди. Аввалига унинг шахсий ҳаётида муаммолар бошланди: 2007 йилда Брендан Фрэйзер тинка мадорни қуритадиган суд жараёнидан сўнг ажрашди. Кейин кетма-кет бир нечта жароҳатлар олди. Буларнинг барчаси узоқ давом этган, деярли ўн йиллик депрессияга олиб келди.

2016 йилда 48 ёшли Брендан интервьюларининг бирида аҳволи ҳақида маълум қилди ва «Брендан Фрэйзерни қутқаринг» кампаниясини ташкил қилган томошабинлар томонидан қўллаб-қувватланди.

Аманда Байнс

2000 йиллардаги ёшларбоп комедиялар юлдузи «Катта семиз ёлғончи«, «У эркак», «Қизлар нима хоҳлайди?» каби фильмлардаги содда, аммо мафтункор қизлар роллари билан машҳур бўлди. Тўсатдан актриса томошабинлар кўз ўнгида том маънода ўзгара бошлади: хатти-ҳаракатларида номутаносиблик пайдо бўлди, спиртли ичимликлар ва тақиқланган моддалар билан боғлиқ муаммолар пайдо бўлди.

Маълум бўлишича, охирги марта 2010 йилда суратга тушган актриса фақатгина гиёҳвандлик билан курашмаган. 2014 йилда 28 ёшли Аманда унга биполяр бузилиш ва депрессив психоз ташхиси қўйилганлигини маълум қилди.

Кетрин Зета-Жонс

Машҳур британиялик актриса ҳаёти давомида биполяр бузилишдан азият чекаётганини ким ўйлабди дейсиз. «Чикаго» мусиқий фильмидаги роли учун «Оскар» совриндори 2011 йилда саломатлиги ҳақида маълум қилди.

Кейин бир неча йил давомида даволанди, шу билан бирга, Майкл Дуглас билан деярли ажрашди — иккаласи ҳам қийин кунларни бошдан кечиришаётганди. Бугунги кунда 52 ёшли актрисанинг карьераси изига тушиб кетди деб бўлмайди, касаллик туфайли у машҳур лойиҳалардан воз кечишга мажбур бўлди.