«Манчестер Юнайтед» қаторасига 5-мавсум совринсиз қолди. Криштиану Роналду 12 йил деганда бирорта совринга эга чиқолмади

«Манчестер Юнайтед» Англия Премьер Лигасининг 32-турида «Эвертон»га ютқазиб қўйди (0:1).

Бу мағлубиятдан кейин манкунианликлар АПЛ чемпионлигини қўлга киритиш имкониятини йўқотди. 31 та ўйиндан кейин «Манчестер Юнайтед» 7-ўринда бормоқда ва пешқадам «Манчестер Сити»дан 22 очко ортда.

Шу тариқа «қизил иблислар» жорий мавсумни ҳам совринсиз якунлайдиган бўлди.

Охирги марта жамоа 2017 йилда соврин қўлга киритганди — Англия Кубоги ва Европа Лигаси. «Манчестер» АПЛда 2013 йилдан бери чемпионликни қўлга кирита олмаяпти.

Жамоа ҳужумчиси Криштиану Роналду 12 йил деганда мавсумни совринсиз якунлайдиган бўлди. Сўнгги бор Роналду 2009/10 йилги мавсумда клуб миқёсида соврин қўлга кирита олмаганди.

Англия Кубогида жамоа 4-босқичда «Мидлсбро» (1:1, пенальти — 7:8) тўсиғидан ўтолмаган бўлса, Чемпионлар Лигасида «Атлетико»га (1:1, 0:1) енгилганди.