Россиянинг «Росатом» давлат корпорацияси Ўзбекистонда атом электр станциясини (АЭС) қуриш лойиҳаси ҳозирча томонлар муҳокамасида. Бу ҳақда «Интерфакс» хабар бермоқда.
Ушбу лойиҳанинг тафсилотлари ҳозир ҳамкасбларимиз билан муҳокама қилинмоқда. Биз АЭС қурилиши мамлакатларимиз манфаатларига мос келадиган икки томонлама ҳамкорликнинг стратегик лойиҳаси эканлигини жуда яхши тушунамиз, — дейди «Росатом» халқаро тармоғи президенти Вадим Титов.Шунингдек, «Росатом» Ўзбекистоннинг шамол энергетикасини ривожлантиришда иштирок этишини таклиф қилмоқда. Чунки «Росатом» Россиядаги шамол электр станцияларининг энг йирик оператори ҳисобланади.
Бундан ташқари, корпорация Ўзбекистонда тиббиёт маҳсулотларини стерилизация қилиш ва қишлоқ хўжалиги маҳсулотларини қайта ишлаш учун кўп функцияли нурланиш маркази лойиҳасини амалга оширмоқда.
2017 йил декабрь ойида Россия ва Ўзбекистон ҳукуматлари атом энергиясидан тинч мақсадларда фойдаланиш тўғрисидаги битимни имзолаган эди.
2019 йил февраль ойида Ўзбекистон президенти Шавкат Мирзиёев 2019—2029 йилларда атом энергетикасини ривожлантириш концепциясини тасдиқлаган эди.