Сурхондарё вилоятининг Узун туманида фуқароларнинг пенсия ва нафақа пулларини онлайн тотализатор ўйинларига ишлатиб юборган банк кассири ушланди, деб хабар беради Бош прокуратура ҳузуридаги департаменти.
Маълум қилинишича, департаментнинг Узун туман бўлими томонидан «Халқ банки» туман филиалининг мурожаатига асосан терговга қадар текширув ўтказилган. Текширув давомида филиалнинг 2-сон сайёр кассаси кассири А.А. 2022 йилнинг февраль—март ойларида ўзига бириктирилган ҳудудда 278 нафар фуқарога нақд пул кўринишида чиқарилган жами 121,1 миллион сўм пенсия ва нафақа пулларини уларнинг номидан сохта имзолар қўйиш орқали ўзлаштиргани аниқланган. Кассир ушбу пулларни интернет тармоғидаги 1Xbet онлайн казино ўйинларига ишлатиб, талон-торож қилган. Текширув давомида департамент аралашуви билан 117 миллион сўм қайтарилган.
Мазкур ҳолат юзасидан Жиноят кодексининг 167-моддаси (ўзлаштириш ёки растрата йўли билан талон-торож қилиш) ва 228-моддаси (ҳужжатларни қалбакилаштириш, сотиш ёки улардан фойдаланиш) билан жиноят иши қўзғатилиб, тергов ҳаракатлари ўтказилмоқда.
Аввалроқ Ўзбекистонда 2021 йилда тотализатор ва букмекерликни реклама қилувчи 30 дан ортиқ сайт блоклангани, Хоразмда тотализатор орқали қўлга киритган 4 та уй ва 3 та машинани фарзандлари номига расмийлаштирган фуқарога жиноят иши қўзғатилгани, ўзбекистонлик аёл эрининг 400 млн сўмини тотализаторда ютқазиб қўйгани тўғрисида хабар берилганди.
Изоҳ (0)