31 март куни Ўзбекистоннинг Мисрдаги фавқулодда ва мухтор элчиси Мансур Қиличев Миср президенти Абдулфаттоҳ Ас-Сисига ишонч ёрлиқларини топширди. Бу ҳақда Ташқи ишлар вазирлиги матбуот хизмати хабар берди.
Маълум қилинишича, тантанали тадбир Қоҳирадаги «Ал-Иттиҳодия» президент саройида бўлиб ўтган. Ишонч ёрлиқларини топшириш маросимида фахрий қоровул саф тортган. Ўзбекистон элчиси шарафига давлат мадҳияси янграган.
Қисқа суҳбат чоғида Миср раҳбари президент Шавкат Мирзиёевга ўзининг самимий саломи ва эзгу тилакларини йўллаб, Миср томони Ўзбекистон билан барча соҳаларда дўстлик ва ҳамкорлик муносабатларини янада ривожлантириш ҳамда мустаҳкамлаш истагини яна бир бор билдирган.
Ўзбекистон—Миср ўртасидаги ҳамкорликни янада мустаҳкамлаш, шунингдек, Миср президентининг 2018 йил 4—5 сентябрь кунлари мамлакатга расмий ташрифи чоғида олий даражадаги музокараларда эришилган келишувларни амалга ошириш юзасидан фикр алмашилган.
Эслатиб ўтамиз, Мансур Қиличев Сенатнинг 2021 йил 8 октябрдаги тегишли қарорига мувофиқ Ўзбекистоннинг Мисрдаги фавқулодда ва мухтор элчиси этиб тайинланганди.
Изоҳ (0)