Кўкрак бези саратони профилактикаси: касаллик ҳақида ҳар бир аёл билиш керак бўлган 10 та факт

Кўкрак бези саратонининг сабаби аниқ маълум эмас, аммо ушбу касалликнинг ривожланиш хавфини камайтирадиган омиллар мавжуд.

1. Фақат соғлом овқатланиш тамойилларига риоя қилиш эмас, балки фойдали озиқ-овқатларни мунтазам равишда истеъмол қилиш тавсия этилади. Буларга қуйидагилар киради: бутгулдошлар оиласига мансуб сабзавотлар, айниқса, карам ва брокколи, қора, кўк ва қизил мевалар, помидор, ёнғоқ, саримсоқ, ловия, сабзи, ўрик, қовоқ.

2. Исмалоқ тановул қилинг! Ушбу маҳсулотни мунтазам истеъмол қиладиган аёллар кўкрак ва бачадон бўйни саратони ривожланиш хавфини камайтиради.

3. Ёнғоқни унутманг! Кунига атиги 15 грамм ерёнғоқ истеъмоли кўкрак бези саратони ва диабет каби кўплаб касалликлардан ўлим хавфини камайтириш учун етарли.

4. Гўштни кўп истеъмол қилиш ўсма пайдо бўлиш хавфини ошириши мумкинлиги ҳақидаги кенг тарқалган қараш нотўғри бўлиб чиқди: 20 дан ортиқ тадқиқотлар буни тасдиқламади. Шунинг учун гўштни ёғсиз ва оқилона миқдорда ейиш мумкин.

5. Спиртли ичимликлар билан эҳтиёт бўлинг! Агар аёл спиртли ичимликларни мунтазам равишда истеъмол қилса, кўкрак саратони хавфи тахминан 7 фоизга ошади.

6. Аёллар, айниқса, менопауза даврида, вазнини кузатиши жуда муҳимдир. Қувват машқлари ва кардио машғулотларининг комбинацияси вазн йўқотиш ва мушак массасини олишнинг энг самарали усули эканлиги аниқланди. Аёлларга ҳафтасига камида 4-7 соат вақтини спорт залида ўтказиш тавсия этилади.

7. Тунги газаклар нафақат бел учун, балки умуман аёллар саломатлиги учун ҳам хавфлидир. Эртароқ овқатланиш ва тунда овқатланмаслик қондаги қанд миқдорининг барқарорлигини таъминлайди ва натижада кўкрак бези саратони ва диабет ривожланиш хавфини камайтиради.

8. Кечаси ухлаш жуда муҳим — бу мелатонин ишлаб чиқариш учун шарт. Кечаси, айниқса 12 соатлик сменада ишлайдиган аёлларда кўкрак бези саратони ривожланиш хавфи ортиши исботланган.

9. Ҳаракат қилинг! Ўтроқ турмуш тарзи аёлларда кўкрак бези саратони, тухумдон саратони ва ўсма ривожланиш хавфини камида 10 фоизга оширади.

10. Кўкракни мунтазам текширувдан ўтказинг! Мунтазам маммограмма текширувида бўлган 50-69 ёшдаги аёлларда ўсимтани эрта босқичда аниқлаш орқали кўкрак саратонидан ўлиш хавфи 40 фоизга камайди.