Аввалроқ Россия эндиликда Европа ва АҚШга газни фақатгина рублда сотиши ҳақида хабар берилган эди. Аниқ тартиб яқин вақт ичида ишлаб чиқилади, бироқ Россиянинг барча ҳамкорлари ҳам янги шартларга рози эмас.
Европада «Газпром»нинг асосий ҳамкорларидан бири бўлган Австриянинг ОМV компанияси Россия гази учун валюта ҳисоб-китобини ўзгартириш нияти йўқлигини билдиради, деб маълум қилди компания бош директори Алфред Штерн.
Хабарни ОАВ орқали кўрдим. Бизга ҳали ҳеч ким қўнғироқ қилмади, бизда амалдаги шартномалар мавжуд, унда эса валюта ҳисоб-китобларини ўзгартириш имкониятлари ҳақида ҳеч қандай бўлим йўқ, — дейди у.
Штерн, ОМВ шартномага мувофиқ «Газпром» билан еврода ҳисоб-китоб қилишда давом эттиришини таъкидлади:
Бизда бошқа шартнома асоси йўқ, бундай ҳам бўлиши мумкин эмас.
Польшанинг PGNIG ва «Газпром» ўртасидаги ҳисоб-китобларни ўз ичига олган келишув ҳам валютани ўзгартириш имкониятини кўзда тутмайди, дейди унинг раҳбари Павел Майевский.
«Газпром» билан тўловлар амалга ошириладиган шартномада валюта ўзгартириш бўйича ҳеч қандай банд келтирилмаган — дейди у.
Литванинг «Газпром»дан газ сотиб олувчи «Ignitis grupe» компанияси Россия газидан воз кечисни режалаштирмоқда, дейди компания вакили Артурас Кетлерюс.
Биз «Газпром»га тўлов қилишни режалаштирмаяпмиз, шундай экан бу биз учун муҳим эмас, — дейди у.
Путиннинг газни фақат рублда тўлаш ҳақидаги қарори Германия газ саноатини чалкашлик домига тортди, дейди Zukunft Gas бирлашмаси раҳбари Тимм Келер.
Иқтисодиёт ва иқлим вазирлиги раҳбари, вице-канцлер Роберт Хабек журналистларга, ҳисоб-китобларни рублда олиб боришга қарор қилиш Россия билан тузилган амалдаги шартномани бузиш деб баҳоланишини айтган.
Тўловларни рублда амалга ошириш ҳақидаги қарор шартномани бузишга киради, — дейди Хабек.
Германия Россия гази учун рублда ҳисоб-китоб қилиши мумкин эди, аммо бунинг учун у Россия Марказий банкига қарши қўлланган санкцияларни бузишига тўғри келган бўларди, деди Иқлим ва энергетика бундестаги қўмитаси раҳбари Клаус Эрнест.
Ҳа, худди шундай бўлиши мумкин эди, аммо Германия Россия Марказий банкидан рубль олишга ва шу билан бирга, ўз санкцияларини четлаб ўтишга мажбур бўларди. Рублда тўлаш мажбурияти, эҳтимол, газ таъминоти ҳақидаги шартномаларнинг бузилиши деб баҳоланарди, — дейди Эрнест.
24 март куни Словения бош вазири Янез Яшна Брюсселдаги Европа Иттифоқи раҳбарлари саммитида Европа Россия газини рублда тўламаслигини билдирди.
Европада кимдир рубль қандай кўринишда эканини билади деб ўйламайман, ҳеч кимнинг рублда тўлаш нияти йўқ, — деди у.
«Молдовагаз» компанияси раҳбари Вадим Чебаннинг маълум қилишича, компания 1 майдан бошлаб «Газпром» билан рублда ҳисоб-китоб қилади. Чебан Молдавияда муаммо пайдо бўлмаслигига умид қилмоқда.
«Газпром»нинг шўъба корхонаси «Газпром экспорт» ўзининг электрон савдо платформаси орқали Ғарбий Европага газни рублда сотишга уриниб кўрди, бироқ 2021 йили ушбу майдонча орқали атиги 7,3 млрд куб метр газ сотилган, октябрь ойи ўртасидан бери савдо бўлмаган.
Изоҳ (0)