Борис Жонсон Евро—2028 ни Украинада ўтказишни таклиф қилди. Мусобақа мезбонлигига Англия ва Ирландия ҳам даъвогар

Буюк Британия бош вазири Борис Жонсон Европа Чемпионатини Украинада ўтказишни таклиф қилди.

Ушбу таклифи сабаб Жонсон ўз мамлакатида кескин эътирозларга учради. Жумладан, Буюк Британия бош вазирининг Англия футбол ассоциацияси (FА) билан муносабатлари ёмонлашди.

Daily Mail’нинг хабарига кўра, сиёсатчи Евро—2028 ни Украина ҳудудида ўтказиш таклифини берганидан сўнг вазият кескинлашган. Чунки сал аввал Буюк Британия ва Ирландия биргаликда мусобақа мезбонлиги учун ФИФАга ариза топширган эди.

Борис Жонсон, шунингдек, Украинанинг саралаш ўйинларисиз ЖЧ—2022 мусобақасига йўл олишига имкон бериш кераклигини ҳам таъкидлаган.

Аввалроқ Россия ҳам 2028 ёки 2032 йилги Европа чемпионатини ўтказишга қизиқаётгани, УЕФА бу аризани рад этишга уриниб кўриш учун шошилинч йиғилиш ўтказиши хабар қилинганди.

Евро—2028 ва Евро—2032 мусобақалари мезбонлиги учун ариза топшириш муддати 12 апрелга қадар узайтирилган. Аввалига бу муддат 23 мартгача қилиб белгиланганди. Турнирлар қайси давлатларда ўтказилиши ҳақидаги қарор 2023 йил сентябрь ойида қабул қилинади.

Маълумот учун УЕФА 2028 йилдан Европа Чемпионати иштирокчилари сонини 32 тага етказмоқчи.