Роналду етакчи, «Манчестер Юнайтед» яна уч футболчиси топ-5 ликда. АПЛнинг энг кўп маош олувчи футболчилари

Франциянинг L’Equipe нашри Англия Премьер Лигасининг энг кўп маош оладиган футболчилари рўйхатини эълон қилди.

Унга кўра, «Манчестер Юнайтед» ҳужумчиси Криштиану Роналду нафақат АПЛнинг, балки топ-4 лигаларнинг ҳам энг кўп маош олувчи футболчиси ҳисобланади.

Португалиялик ойига 2,63 миллион евро маош олади. Бу борада АПЛда иккинчи ўринда «Манчестер Сити» ярим ҳимоячиси Кевин де Брюйне турибди — ойига 2,06 миллион евро.

Топ-5 ликнинг қолган футболчилари ҳам «Манчестер Юнайтед» вакили ҳисобланади. Дарвозабон Давид де Хеа учинчи ўринда (ойига 1,93 млн евро), тўртинчи — Жейдон Санчо (1,85 млн евро), ҳимоячи Рафаэл Варан (1,62 млн евро) эса бешинчи поғонада.

Испания Ла Лигасида энг кўп маош «Барселона» ҳимоячиси Херард Пикега (2,33 млн) тегишли, Бундеслигада «Бавария» ҳужумчиси Роберт Левандовски (2 млн) энг кўп маош олади. «Ювентус» форварди Пауло Дибала (1,13 млн) эса бу борада Италия А Серияда етакчи.