«Челси» Буюк Британия ҳукуматини жорий чекловлар остида мавсумни якунлай олмаслиги мумкинлиги ҳақида огоҳлантирди

Роман Абрамовичга нисбатан жорий қилинган санкциялар «Челси»нинг банкрот бўлишига олиб келиши мумкин.

«Челси» Буюк Британия ҳукуматини Абрамовичга нисбатан жорий қилинган санкцияларнинг таъсири клубнинг мавсумни якунлаш қобилиятига хавф солаётгани ҳақида огоҳлантирган. Barclays банки лондонликлар ҳисобини вақтинча музлатиб қўйган 11 март куни эса вазият янада мураккаблашган.

The Telegraph нашрининг ёзишича, ҳозирги вазиятда Лондон клуби «Стемфорд Бридж»да етарли миқдорда хавфсизликни таъминлай олмайди. Шунингдек, овқатланишни ташкил қилиш учун етарли имкониятлар бўлмайди. Шу сабабдан клуб стадионнинг айрим секторларини ёпишга мажбур бўлади.

«Челси»нинг фикрича, агар амалдаги чекловлар давом этса, клуб мавсумни якунлай олмайди. Лондонликлар клубга нисбатан қўлланилган чекловлар яқин кунларда кўриб чиқилишига умид қилмоқда.

Хусусан, «Челси»га фақат уй учрашувларини ташкил қилиш учун 500 минг фунт сарфлашга рухсат берилган. Бироқ Буюк Британия ҳукуматига Премьер Лиганинг битта ўйини учун 800 минг фунт стерлингдан 1 миллион фунт стерлинггача керак бўлиши айтилган. «Челси» ҳукуматга стадионнинг айрим секторларида хавфсизлик ва озиқ-овқат билан таъминлай олмаслиги ҳақида маълум қилган. Клубнинг таъкидлашича, ҳозирги вазиятда ягона вариант трибуналарнинг қисман ёки тўлиқ ёпилиши бўлади.

Шунингдек, «Челси» чипта сотилиши Роман Абрамовичга фойда келтирмаслигига эътибор қаратган. Клуб вакилларининг фикрича, бу фақат мухлисларга кераксиз ноқулайликлар келтириб чиқаради ва клуб имижига ёмон таъсир қилади.

Ҳозирда «Челси» ўз ўйинларига чипта сота олмайди. Шунингдек, лондонликларга трансферларни амалга ошириш ва футболчилар билан шартнома узайтириш ҳам тақиқланган.

Бундан ташқари, Премьер Лига Роман Абрамовични «Челси»дан четлатди. Лиганинг билдиришича, бизнесмен Буюк Британия ҳукумати санкциялари туфайли клуб раҳбари сифатида «дисквалификация қилинган».

Қайд этилишича, бу қарор жамоанинг ўйинларда иштирок этиши ва машғулотларига таъсир қилмайди.

Эслатиб ўтамиз, 27 февраль куни Абрамович Украинадаги вазият туфайли «Челси» бошқарувини клуб хайрия фондига топширди. 3 март куни эса 2003 йилдан бери бошқариб келаётган жамоасини сотишга қарор қилганини маълум қилди.