1 март куни Ўзбекистон соғлиқни сақлаш вазири Беҳзод Мусаев ҳамда ЮНИСЕФнинг Ўзбекистондаги ваколатхонаси раҳбари Мунир Мамедзаде томонидан 2022—2025 йилларга мўлжалланган «йўл харитаси» имзоланди. Бу ҳақда ССВ матбуот хизмати хабар берди.
Мазкур ҳужжат мамлакатда соғлиқни сақлаш тизимини ривожлантиришга доир умумий қиймати 102,5 миллион долларилик қўшма чора-тадбирларни ўз ичига олади. У тўрт асосий йўналишдан иборат.
Дастлабки йўналиш — Ўзбекистонда перинатал хизматлар кўрсатиш сифатини янада яхшилаш билан боғлиқ долзарб вазифаларга қаратилган. Оналик ва болаликни муҳофаза қилишга ихтисослашган тиббиёт ходимларининг билим ва малакасини ошириш, даволаш муассасалаларини замонавий тиббий асбоб-ускуналар билан жиҳозлаш, кам вазнли чақалоқлар ҳаётини сақлаб қолишдек муҳим чора-тадбирлар шулар жумласидан.
Иккинчи йўналиш — миллий календарга киритилган вакциналар билан болаларни эмлаш, мавжуд санитар пунктларни замонавий ускуналар билан жиҳозлаш, у орқали мамлакатда иммунизация жараёнларини такомиллаштириш каби вазифаларни ўз ичига олади.
Қолаверса, Қорақалпоғистон Республикасидаги қатор умумтаълим мактабларининг санитария-гигиена ҳолати ҳамда ўқувчиларнинг саломатлиги учун муҳим бўлган сув таъминотини яхшилашга йўналтирилган йирик лойиҳалар амалга оширилади. Шунингдек, болаларда ёд етишмовчилиги, камқонликнинг олдини олиш сингари қатор масалалар ечими ҳам кўзда тутилган.
Учинчи йўналиш — оналар ва болаларнинг овқатланишини яхшилашга қаратилган чора-тадбирлардан иборат. Улар орасида 6—23 ойлик болалар ва 35 ёшгача бўлган хотин-қизларни темир ҳамда фоли кислотаси билан таъминлаш, умумтаълим мактабларида овқатланиш стандартларини ишлаб чиқиш каби долзарб вазифалар ҳам бор.
Сўнгги йўналиш — ўсмирларга тиббий хизмат кўрсатиш сифатини оширишни назарда тутади. Бунинг доирасида мактаб ўқувчилари саломатлиги билан боғлиқ миллий стратегия ишлаб чиқиш, шу ёшдаги ўғил-қизларга хизмат кўрсатувчи тиббиёт ходимлари учун ўқув дастурлари тайёрлаш, ёшлар ўртасида соғлом турмуш тарзини тарғиб этувчи платформа яратиш каби лойиҳалар рўёбга чиқарилади.
Умуман, икки томонлама имзоланган «йўл харитаси» ижроси Ўзбекистонда оналар ва болалар саломатлигини мустаҳкамлаш, шу йўналишда фаолият юритувчи тиббиёт ходимларининг билим ва тажрибасини янада оширишга хизмат қилади.
Аввалроқ коронавирусга қарши кураш учун ажратилган маблағларнинг сарфланиши бўйича Беҳзод Мусаевга парламент сўрови юборилгани, Япония Термиз туманидаги тиббиёт муассасаларининг сув таъминотини яхшилашга ёрдам бериши тўғрисида хабар берилганди.
Изоҳ (0)