Сўнгги кунларда Фарғона водийсидаги метан газ тўлдириш шохобчаларида давомийлиги бир неча километр бўлган автомобиллар навбати кузатилмоқда. Бу ҳақда «Дарё»га мурожаат қилган ҳайдовчиларнинг маълум қилишича, газ тўлдириш шохобчаларидаги навбатларнинг юзага келиши заправкалар фаолиятига киритилган чекловлар билан боғлиқ.
2021 йил куз-қиш мавсумида автомобилларга газ тўлдириш шохобчалари фаолиятига дастлабки чекловлар 2021 йил 17 ноябрь кунидан бошлаб киритилганди. Шу куни Энергетика вазирлиги куз-қиш мавсумида аҳоли ва ижтимоий соҳа объектларини узлуксиз равишда табиий газ билан таъминлаш мақсадида автомобилларга газ тўлдириш шохобчаларига ҳар куни соат 18:00 дан тонгги соат 06:00 гача газ етказиб бериш вақтинча тўхтатилишини маълум қилди.
Шундан сўнг Фарғона вилоятидаги юздан ортиқ автомобилларга газ тўлдириш шохобчалари тонгги соат 06:00 дан кеч соат 18:00 гача ишлаш режимига ўтказилди.
«Ҳурматли истеъмолчилар, вактинчалик чеклов чоралари ҳаво ҳарорати бироз кўтарилгунга қадар давом этади ҳамда АГТКШ тез орада аввалги тартибда ишлаш режимига ўтишини маълум қиламиз», — дейилади Энергетика вазирлигининг 2021 йил 17 ноябрь кунги ахборотида.
Бироқ ўтган давр мобайнида ҳаво ҳарорати кўтарилган бўлса-да, метан заправкалар аввалги тартибда ишлаш режимига қайтарилмаган. Аксинча, жорий йил январь ойидан бошлаб вилоятдаги аксарият метан заправкалар иш вақтини яна-да қисқартириб, соат 16:00 дан кейин фаолиятини тўхтатган. Февраль ойига ўтиб эса, автомобилларга газ тўлдириш шохобчалари тонгги соат 06:00 дан 15:00 гача ишлаш режимига ўтказилди. Натижада вилоятдаги газ заправкалар олдида турнақатор навбатлар юзага келишни бошлади.
2021 йилнинг 15 февраль куни «Ўзтрансгаз» АЖ матбуот хизмати Фарғона водийсидаги автомобилларга газ тўлдириш компрессор станциялари 15 февраль куни соат 13:00 дан 16 февраль куни соат 06:00 гача фаолиятини вақтинча тўхтатиши ҳақида хабар берди. Ташкилот матбуот хизматининг қўшимча қилишича, 16—18 февраль кунлари ҳам Фарғона водийсидаги автомобилларга газ тўлдириш компрессор станциялари фаолиятига шу каби чекловлар жорий қилинган.
Ушбу чекловлар ортидан Фарғона вилоятидаги автомобилларга газ тўлдириш шохобчалари олдида юзлаб автомобиллар навбати юзага келган.
Ҳайдовчиларнинг маълум қилишича, турнақатор навбатлар туфайли автомашинага газ тўлдириш учун икки-уч соат, баъзида беш-олти соат вақт кетмоқда.
«Икки кун олдин шу жойдан машинамга уч-тўрт соатда газ тўлдириб чиққандим. Бугун соат 09:00 да заправкага келиб, навбатга турдим. Мана, соат 13:00 бўлди, ҳали навбатим келгани йўқ. Бир соатдан кейин заправка ёпилади. Агар шу вақтгача навбатим келиб, газ тўлдиришга улгурмасам, ярим куним бекор ўтган бўлади. Ҳали мендан кейин ҳам камида юзта машина навбатда турибди. Уларнинг кўпчилиги бугун газ тўлдиришга улгурмайди, барибир қайтиб кетишга мажбур бўлади. Шунча одам сарсон. Юзлаб ҳайдовчилар соатлаб заправкаларда қолиб кетяпти. Бошида бу чекловлар вақтинчалик, ҳаво ҳарорати кўтарилиши билан заправкалар 24 соат ишлайди, дейишганди. Мана шу гаплар айтилганига ҳам икки ойдан ошди, кунлар ҳам исиб қолди. Лекин вақтинчалик чекловлар бекор қилингани йўқ. Кундан кунга навбатлар кўпайиб кетяпти. Бунинг устига газнинг босими ҳам паст», — дейди Қўқон шаҳридаги заправкалардан бирида навбатда турган ҳайдовчи Икромжон Абдуллаев.
Кўпчилик ҳайдовчилар соатлаб навбат кутиб, машинасига газ тўлдира олмай, тонггача заправкада қолиб кетишга мажбур бўлмоқда.
«Иш юзасидан Бағдод туманидан Фарғона шаҳрига келгандим. Соат 11:00 ларда машинамга газ тўлдириш учун навбатга турдим. Навбатим келишига оз қолганди, соат 14:00 га яқин заправка ёпилди. Энди эртага эрталаб соат 06:00 дан газ қуйишни бошлайди. Машинамда газ тугаган, аксига олиб, бензин ҳам йўқ, ноилож, тонггача кутаман. Бугун шу ерда, машина ичида қолишга мажбурман. Менга ўхшаган ҳайдовчилар кўп бу ерда», — дейди Сарвар Муҳиддинов.
Фарғона шаҳридаги автомобилларга газ тўлдириш шохобчаларида кеч соат 19:00 да ҳам ўнлаб автомашиналар навбатда турганига гувоҳ бўлдик. Ҳайдовчиларнинг айтишича, газ-заправкалар тонг соат 06:00 да иш бошлайди. Шундай бўлса-да, кўпчилик ҳайдовчилар машиналарини бир кун олдин навбатга қўйишга ҳаракат қилади. Мақсад — қаторнинг бошроғидан жой эгаллаш ва эртароқ газ тўлдириб олиш.
«Damas автомашинам бор. Йўловчи ташиш билан шуғулланаман. Илгари машинамга бир кунда икки марта газ тўлдириб, шунга яраша ишлаб, даромад қилардим. Газ заправкалар ҳам бемалол эди. Қиш кириши билан муаммолар бошланди. Соат бир-иккидан кейин бирорта заправка ишламайди. Ҳаммаси ёпилади. Агар заправкага эрталаб олти-еттиларда келсангиз, тушликкача вақтингиз навбат кутиш билан ўтиб кетади. Шунинг учун бир кун олдин кечки пайт заправкага келиб, навбатга тураман. Кечаси билан шу ерда қоламан, тонгда заправка очилиши билан газ тўлдириб, тирикчиликка чиқиб кетаман. Ҳар куни шу аҳвол», — дейди Фурқатжон Саъдуллаев.
Айрим шохобчаларнинг назоратчилари томонидан асосий навбат қаторидан ташқари «премиум-навбат» ҳам ташкил этилган. Узоқ кутишни истамаган ҳайдовчи қўшимча 5-10 минг сўм тўлайди ва узоқ навбатларсиз, икки баробар тезроқ вақт ичида газ тўлдириб олади.
«Назоратчиларга беш минг сўм бердим. Заправканинг чиқиш дарвозасидан ичкарига кириб, бир соатга қолмай газ тўлдириб чиқдим. Тўғри, бу томонда ҳам навбат бор, лекин ишингиз тезроқ битади. Уч-тўрт соатлаб навбатда турмайсиз», — дейди ушбу «имконият»дан фойдаланган ҳайдовчилардан бири.
Фарғона шаҳридаги метан заправкалардан бири чекловларга қарамасдан тунги вақтларда ҳам фаолиятини давом эттирмоқда. «Дарё» мухбирининг аниқлик киритишича, бу ерда шахсий автомашиналарга эмас, фақат йўловчи ташувчи автобусларга ва «Тоза ҳудуд»га қарашли махсус транспорт воситаларига газ тўлдирилмоқда.
«Дарё» манбасининг таъкидлашича, кун давомида шаҳарда жамоат транспорти ва ободонлаштириш корхоналарининг барқарор ишлашини таъминлаш мақсадида шундай йўл тутилмоқда.
Ҳозирга келиб ҳаво ҳарорати анча кўтарилган, водийда баҳор ҳавоси ҳукмрон. Лекин автомобилларга газ тўлдириш шохобчалари олдида турнақатор навбатлар юзага келиши давом этмоқда. Ҳайдовчилар ва йўловчилар соатлаб вақтини йўқотяпти, бу ҳолат йўлкиралар ошишига ҳам ўз таъсирини ўтказмоқда. Метан заправкалардаги адоқсиз навбатлар каби бу муаммоларнинг ҳам охири кўринмаяпти.
Изоҳ (0)