«Рома» матбуот хизмати жамоанинг тўрт нафар аъзосида коронавирус аниқлангани ҳақида хабар берди.
Қайд этилишича, футболчиларда касалликнинг енгил аломатлари кузатилмоқда ва улар ўзини-ўзи яккалаш ҳолатига олинган. Бироқ Рим клуби вирус юқтириб олган футболчилар номини ошкор қилмади.
Аммо бунгача Италиянинг бир қатор нашрларида «Рома»да коронавирус авж олгани ва Жозе Моуриньо таркиб борасида жиддий муаммоларга дуч келгани ҳақида ёзилганди. Хусусан, унда Элдор Шомуродов ва Генрих Мхитарян каби асосий жамоа ўйинчиларида коронавирус аниқлангани хабар қилинган.
Шунингдек, жамоа ярим ҳимоячиси Никола Заниолонинг жароҳат сабаб сафдан чиққани ҳамда унинг А Серия 26-тури доирасидаги «Верона»га қарши ўйинни ўтказиб юбориши мумкинлиги айтилган.
Қайд этиш ўринли, «Рома» — «Верона» ўйини 19 февраль, шанба куни соат 22:00 да бошланади.
Маълумот учун, «Рома» мусобақа жадвалида 25-турдан кейин 40 очко билан 7-ўринни эгаллаб турибди. Элдор Шомуродов эса Италия чемпионатининг 2021/22 йилги мавсумида 19 ўйинда ўз номига 2 та гол ёздириб қўйди.
Мавзуга доир:
- «Ростов», «Рома»га ўтиш, Моуриньо, муваффақият сири, Ўзбекистон ва Италия менталитетидаги фарқ ҳақида. Элдор Шомуродов УЕФАга интервью берди
- Элдор Шомуродовнинг «Лечче» дарвозасига киритган тўпи «Рома»нинг январь ойидаги энг чиройли голи деб топилди (видео)
- Серқуёш Жарқўрғондан кўҳна Римгача. Элдор Шомуродов босиб ўтган йўл
Изоҳ (0)