Энергетика вазири Алишер Султонов Тошкентда «Фолксваген Груп Рус» МЧЖ делегацияси билан учрашув ўтказди. Бу ҳақда вазирлик матбуот хизмати хабар берди.
Ўзбекистонда электромобиллар ишлаб чиқариш каби йўналишнинг ривожланиши «Фолксваген Груп Рус» МЧЖда катта қизиқиш уйғотди, — дейилади матбуот хизмати хабарида.
Учрашувда Ўзбекистонда электромобиллар импорти учун акцизлар ва божхона тўловлари олинмаслиги таъкидланди.
Бир неча ёнилғи қуйиш шохобчаларида электрокарлар учун зарядлаш станциялари ишламоқда ва мазкур йўналиш бўйича хусусий бизнес ривожланиши юз бермоқда.
Электромобиллар ишлаб чиқарилиши бўйича бошқа режалар
«Ўзавтосаноат» электромобиллар устида иш олиб бораётгани илк бор 2018 йил май ойида маълум бўлган эди. Компаниянинг ўша вақтдаги раҳбари Умиджон Салимов «яқин икки ой ичида электромобилларни ишлаб чиқаришни ташкил этиш бўйича республика концепцияси тайёрланиши»ни билдирган эди.
2020 йил ноябрида эса «Ўзавтосаноат»нинг тадқиқот маркази муҳандислари «ярим йил ичида» нархи 10 минг доллар атрофида бўладиган, бир марта тўлиқ қувватлантирилгач, 150 километр йўл боса оладиган Labo электромобиллари ишлаб чиқарилиши мумкинлигини маълум қилган.
«Ўзавтосаноат» компаниясининг Стратегия бўлими бошлиғи Рустам Қодиров 2021 йил март ойида UzAuto Motors’нинг Асака шаҳрида ташкил этилган матбуот анжуманида халқаро таҳлиллардан келиб чиқиб, компания прогнозлари бўйича бизнинг шароитда электромобиллар ишлаб чиқаришни 2025 йилдан кейин ўйлаб кўрса бўлишини, шу боис ҳозирда электромобиллар борасида фақат концепция йўналишида иш олиб борилаётганини айтган.
Ўша йилнинг июнь ойида «Дарё» мухбири билан суҳбатлашган «Ўзавтосаноат» раҳбари Шавкат Умрзоқов Ўзбекистонда электромобилларни оммавий ишлаб чиқариш кичик бизнес ривожланганидан сўнг бошланишини айтиб, Damas’ни электромобиллар хизматидан оммавий фойдаланишга ўтиш йўлидаги муҳим бир кўприкка тенглаштирган.
Изоҳ (0)