Қозоғистон ҳукумати маҳаллий автомобиль ишлаб чиқаришни импортдан ҳимоя қилишни бекор қилмоқчи

Россиялик сармоядорлар Қозоғистон президенти Қосим-Жўмарт Тўқаевнинг утилизация йиғимини кўриб чиқиш ҳақидаги фармойишидан хавотирда. Бу ҳақда «РБК» нашри хабар бермоқда.

Бундан Қозоғистондаги бир нечта автомобиль ишлаб чиқарувчи хавотирда, чунки утилизация йиғимининг кўриб чиқилиши маҳаллий автомобиль ишлаб чиқаришни импортдан ҳимоя қилишни бекор қилади. 

Мисол учун, «КамАЗ» мамлакатда таркибий қисмларни маҳаллийлаштириш бўйича ўз мажбуриятларини бажаришда муаммоларга учраши ва инвестиция лойиҳаларини амалга оширишда қатор қийинчиликларга дуч келиши мумкин.

Ҳозирда Қозоғистонда Россиянинг Lada, «УАЗ», «ГАЗ», «Урал» ва «КамАЗ» йиғиш заводлари бор. Нашрнинг ёзишича, Қозоғистонда автомобиллар йиғишга сармоя киритган россиялик тадбиркорлар мамлакатда ўз фаолиятини тўхтатиши мумкин.

Январь ойи бошида Қозоғистонда ёқилғи нархи ошиши сабабли норозилик намойишлари бошланган ва бу кейинчалик тартибсизликларга айланган эди