Бунёд Абдуллаев Ўзбекистон экология ва атроф-муҳитни муҳофаза қилиш давлат қўмитаси матбуот хизмати раҳбари лавозимига тайинланди, деб хабар беради Telegram’даги «Ecologuz» канали.
«Gazeta.uz»нинг ёзишича, ҳозирга қадар қўмита раиси матбуот котиби лавозимида фаолият юритган Озод Ражабов ишдан бўшаган.
Хронология
2021 йилнинг 10 февраль куни Бунёд Абдуллаев бош вазир ўринбосари Очилбой Раматов раислигидаги йиғилишда қўмитанинг 6 нафар раҳбар ходими ишдан олиниши ва улар орасида ўзи ҳам айтилгани ҳақида маълум қилганди. Абдуллаев бу қарор у учун кутилмаган бўлганини, бундан олдин Президент администрацияси вакиллари билан йиғилишда қўмита матбуот хизмати фаолиятига ижобий баҳо берилганини таъкидлаган эди.
Унинг айтишича, бош вазир ўринбосари билан йиғилишда сўз беришларини сўраб, қўлини кўтарган, лекин ҳеч ким унга эътибор бермаган. У йиғилиш тугамасидан олдин чиқиб кетган.
Экология қўмитаси матбуот котиби ишдан ҳайдалишига Очилбой Раматов «штаби»дан берилган топшириқни бажаришдан бош тортгани сабаб бўлганини таъкидлаган эди. Унга бош вазир биринчи ўринбосарининг имижини тарғиб қилиш мақсадида ОАВда тарқатиш учун ҳар жума куни тасдиқланган мавзу бўйича маълумот тақдим этиш сўралган. Бунёд Абдуллаев топшириқ ёзма равишда берилсагина бажаришини айтган, лекин унга ёзма топшириқ берилмаган.
Шундан сўнг қўмита нашр томонидан 10 февраль куни эълон қилинган мақолада келтирилган «важлар ҳақиқатга мос келмаслигини» айтганди.
«Бунёд Абдуллаевнинг унга юқори идоралар вакиллари томонидан босим ўтказилгани хусусидаги даъволари ҳужжатли асосга эга эмас», — дейилганди қўмита муносабатида.
«Б. Абдуллаевнинг ‘Gazeta.uz’ сайтига берган ёлғон маълумотлари Давлат экология қўмитаси жамоасини ҳайратга солмоқда. Унинг йиғилишда сўз сўрагани, касбдошлари гаплашмай қўйгани каби важлари, олдинги йиғилишда мақталгани ҳам нотўғридир. Ўша мулоқотда матбуот хизмати бонг урмаётгани танқид қилинган аслида», — дейилганди хабарда.
Давлат экология қўмитасининг таъкидлашича, қўмита ходимининг хулқ-атворини ва касбий фаолиятини баҳолашда 2018 йил 15 июнь куни тасдиқланган Одоб-ахлоқ қоидаларига риоя этилишини маълум қилган. «Бунёд Абдуллаев эса ҳукумат вакиллари иштирокида расмий тадбирда ўзбошимчалик билан иш тутганини ҳеч нарса билан оқлаб бўлмайди», — дейилган муносабатда.
Ўшанда қўмита қоидаларнинг айнан қайси бандига асосан ходим йиғилишдан чиқиб кетиши тақиқлангани ҳақида маълумот бермаганди. Қўмита Бунёд Абдуллаевнинг ўз хоҳиши билан меҳнат шартномасини бекор қилишни сўраб, ариза ёзиб кетганини қайд этганди.
Изоҳ (0)