14 январь — Ватан ҳимоячилари куни муносабати билан мустақил ижод қилиш билан бирга ҳарбий ансамблларда ҳам фаолият юритаётган шоу-бизнес вакиллари билан таништиришга қарор қилдик
Учқун Тиллаев
Ўзбекистонда хизмат кўрсатган артист Учқун Тиллаев 2006 йилдан буён Ички ишлар вазирлиги ҳузуридаги «Ашула ва рақс» ансамблида фаолият юритади. Аввалига бадиий раҳбар сифатида фаолият юритган подполковник Учқун Тиллаев 2014 йилдан буён ансамблнинг маданият саройи раҳбари ҳисобланади.
Дилсўз
«Ниҳол» номидаги давлат мукофоти совриндори Дилсўз ҳам Ички ишлар вазирлиги ҳузуридаги «Ашула ва рақс» ансамблида фаолият юритади.— Ишга кирганимга 8 йил бўлди. Вазирликнинг барча байрам концертларида иштирок этишга ҳаракат қиламан. Ҳарбийлар сингари бизга ҳам аниқ талаблар қўйилган, — дейди Дилсўз.
Ширин Маматова
Хонанда Ширин Маматова ҳам 2010 йилдан бери Давлат хавфсизлик хизмати тизимида фаолият юритади. У 2019 йилдан кичик сержант унвонини қўлга киритган.
Паризода
Актриса Паризода ҳам Ички ишлар вазирлиги ҳузуридаги маданият саройида тўгарак раҳбари сифатида фаолият юритади. Унинг жажжи қизлари Ички ишлар вазирлиги томонидан ўтказиладиган кўплаб концерт дастурларида иштирок этишади.— Бу ерда ишлаётганимда 10 йил бўлди. Ички ишлар ходимлари билан ишлаш жуда қизиқ, — дейди раққоса Паризода.
Руҳшона
Хонанда Руҳшонанинг Ўзбекистон Миллий гвардияси ансамблига қабул қилинганига кўп бўлмади. Аммо хонанда ансамбл тизимида ўтказиладиган байрам дастурларида фаол иштирок этмоқда.
Машҳура Эргашева
Актриса Машҳура Эргашева 15 йилдан буён Ички ишлар вазирлиги ҳузуридаги «Ашула ва рақс» ансамблида 1-тоифали хонанда ва сержант сифатида фаолият юритади.— Ҳарбий ансамблда ишлашнинг ҳам ўзига яраша гашти ва машаққати бор. Биз концертлардан ташқари, ижодий учрашувлар ва тарғиботларга ҳам борамиз. Ижодимнинг бир қисми ватан посбонлари билан боғлиқ эканлигидан фахрланаман, — дейди Машҳура Эргашева.
Феруза Жуманиёзова
Хушовоз хонанда Феруза Жуманиёзова ҳам Ички ишлар вазирлиги ҳузуридаги «Ашула ва рақс» ансамблида фаолият юритади.— Ишга кирганимга кўп бўлмади. Аммо икки йил давомида бу жамоа билан ишлаб афсусланганим йўқ. Ҳозирча ҳарбий даражани қўлга киритмадим. Аммо келажакда мени бундай мукофот билан сийлашларига ишонаман, — дейди хонанда.
Хадича
Хонанда Хадича ҳам бир муддат ҳарбий ансамблда фаолият юритганди. Ҳозир эса мустақил ижод билан банд.
Аваз Охун
Қизиқчи Аваз Охун ҳам бир неча йиллардан буён Ички ишлар вазирлиги ҳузуридаги «Ашула ва рақс» ансамблида фаолият юритади.
Изоҳ (0)