Муддати ўтган косметик воситалардан фойдаланиш юз терисига қандай таъсир қилади?

Аёл ва қизларнинг косметикалари орасида муддати ўтган ва яроқсиз бўлган воситалар кўплаб топилиши аниқ. Яроқлилик муддати ўтишидан ташқари банка ёки қопқоғининг шунчаки очиқ қолиши ҳам уларнинг яхши самара бермаслигига сабаб бўлмаслиги мумкин. Аксарият аёллар йиллар давомида тери муаммоларидан азият чекиши, мутахассислар, хусусан дерматологларга қатнаб чарчаши мумкин. Аммо аксарият ҳолларда улар муаммонинг косметик воситанинг вақти ўтгани билан боғлиқ эканини хаёлига ҳам келтирмайди.

Косметик воситаларга яроқлилик муддати нима учун керак?

Исталган парвариш қилишга мўлжалланган косметика, у гел ёки тоник бўлишидан қатъий назар, мураккаб кимёвий таркибга эга ҳисобланади. Унда экстрактлар, ёғ, қуюлтирувчилар ва стабилизаторлар, шунингдек, консервантлар мужассам бўлади. Албатта, табиий косметик воситаларда консервантларнинг миқдори кам ёки умуман йўқ бўлади. Аммо кимёвий консервантлар қанчалик кам бўлса, яроқлилик муддат шунча қисқа бўлади.

Яроқлилик муддати тугаганидан кейин фойдаланса нима бўлади?

Косметика самарасиз бўлиб қолишдан ташқари, унинг кимёвий таркиби ҳам ўзгаради. Фаол компонентлар заифлашиб, оксидланиш ҳолати кузатилади. Энг ёмон тарафи унда касаллик қўзғатувчи микроорганизмлар кўпая бошлайди.

Умуман олганда айнан органик компонентлар бактериялар ўсиши учун қулай муҳит ҳисобланади. Бир ҳафтанинг ўзида крем идиши стафилококк ва стрептококк, шунингдек, ичак таёқчалари учун ҳақиқий инкубатор бўлади қолади. Терининг устки эпидермисдан ташқари яна бир бактериал ҳимоя қатлами — тери микрофлораси бўлади. У терининг ҳимояси ва иммунитети ҳисобланади. Патоген микроорганизмлар у ерда яллиғланиш жараёнларини келтириб чиқаради. Иммунитет мустаҳкам бўлса аввалига тери бунга таъсирланмаслиги керак. Аммо доимий равишда фойдаланилганда юз таъсирчан бўлиб қолади ва сезувчанлиги ортади. Терининг иммунитети пасайиши бу эса кейинчалик тери билан боғлиқ турли муаммоларнинг келиб чиқишига ҳисса қўшиши мумкин. Айниқса, патоген микроорганизмларнинг косметик восита билан бирга лаб ва кўз шиллиқ қаватига тегиши хавфлироқ ҳисобланади. Бу конюктивит, блефарит ва герпесларни келтириб чиқариши мумкин.

Тери саломатлигини таъминлаш учун нима қилиш керак?

Идиши чиройли экани ёки бошқа сабабни важ қилиб ўтирмасдан яроқлилик муддати тугаган косметик воситани дарҳол ташлаб юборинг. Фойдаланиш муддати тугаса, лекин ҳеч қандай ўзгариш кузатилмаса ҳам ундан дарҳол воз кечинг. Сабаби унда аллақачон бактериялар кўпайишни бошлаган бўлиши мумкин. Шунингдек, совиткичда сақлаш косметик воситанинг яроқлилик муддатини оширади, деган янглиш фикрдан ҳам воз кечинг.