Танадаги деярли барча тизимлар фаолияти қалқонсимон безнинг меъёрида ишлашига боғлиқ. Рационда шакар, углевод, спиртли ичимликлар, трансёғлар кўп бўлган мувозанатсиз овқатланиш ушбу аъзонинг фаолиятини бузиши, бошқа касалликларнинг ривожланишига олиб келиши мумкин. Қалқонсимон без учун фойдали бўлган маҳсулотларни эса қуйида маълум қиламиз.
Тухум
Чиндан ҳам супер маҳсулот: тухум юрак, метаболизм, қон томирлари ва қалқонсимон без учун фойдалидир. У қалқонсимон безнинг фаолиятини қўллаб-қувватлайдиган ва унинг функцияларини яхшироқ бажаришга ёрдам берадиган селенга бой.
Сардина балиғи
Балиқ ва денгиз маҳсулотлари ёдга бой бўлгани туфайли қалқонсимон без учун фойдали, деган қараш мавжуд. Чиндан ҳам балиқнинг баъзи турлари фойдалидир, чунки улар кўп миқдорда селенни ўз ичига олади. Селен – қалқонсимон без фаол ишлаши учун зарур бўлган модда ҳисобланади. Шунинг учун балиқнинг ушбу турини тез-тез истеъмол қилиш тавсия этилади.
Исмалоқ
Исмалоқ нафақат темир, балки селеннинг ҳақиқий хазинаси ҳисобланади. Агар у камида ҳафтасига бир марта истеъмол қилинса, ҳатто жуда дангаса қалқонсимон безни ҳам фаоллаштириб юбориш мумкин.
Ёнғоқ
Биринчидан, ёнғоқлар вазн сақлашга ёрдам беради: улар оқсилга бой. Бу маҳсулот тўйимли бўлиб, узоқ вақт давомида тўқлик ҳиссини беради. Ортиқча вазн эса қалқонсимон без саломатлигини заифлаштирадиган омиллардан биридир. Иккинчидан, ёнғоқ ҳам селенни ўз ичига олади, шунинг учун уларни рационга киритиш керак.
Сут маҳсулотлари
Сут ёғи қалқонсимон безнинг саломатлиги ва тўғри ишлаши учун зарур бўлган Д витаминининг сўрилиши учун жуда муҳимдир. Бу қимматли витаминни қуёш нуридан олиб бўлмайдиган қиш ва куз мавсумида сут маҳсулотларини кўпроқ истеъмол қилиш саломатлик учун муҳимдир.
Саримсоқ пиёз
Ҳа, ушбу хушбўй сабзавот нафақат шамоллашнинг олдини олишда фойдали, балки рухга ҳам бойдир. Айниқса, заифлашаётган қалқонсимон без учун зарурдир.
Қўзиқорин
Саримсоқни ёқтирмайдиган инсонлар уни қўзиқорин билан алмаштириши мумкин. Чунки ушбу маҳсулотда ҳам рух моддаси кўп. Баъзи қўзиқоринлар Д витаминига бой бўлиб, қалқонсимон безга икки баравар фойда келтириши мумкин.
Изоҳ (0)