Патчи пул сарфлашга арзийдими ёки бу шунчаки маркетингми?

Кўз остидаги шишларни бартараф қилишга мўлжалланган патчилар чиндан ҳам самаралими ёки йўқлиги ҳақида Cosmopolitan нашри маълумот бериб ўтади.

Патчи — таркибида фаол моддалар бисёр бўлган косметик воситалар сингдирилган, кўз остига ёпиштириладиган мато ёки гелли пластир.

Қандай самара беради?

Фаол моддалар сероб экани ҳисобига дарҳол натижа бериши патчининг ўзига хослиги ҳисобланади. Патчилар кўпинча 15-20 дақиқада теридаги илиқлик таъсирида иш бера бошлайди. Уни олгандан кейин воситанинг қолдиқларини артиш эмас, енгил ҳаракатлар билан терига сингдириш керак бўлади.

Қандай фойдаланиш керак?

Яхшилаб тозаланган терига, кўздан 3-4 мм пастроққа ёпиштириш керак. Ингичка тарафи бурун томонда бўлса шиш ва ажинлардан, кенг томони бўлса кўз остидаги ҳалқалардан қутулиш мумкин.

Чиндан фойдалими ёки бу маркетингми?

Патчи чиндан ҳам фойдали. Аммо у оний натижа бергани учун макияждан аввал фойдаланиш керак. Кечаси уйқудан аввал фойдаланиш эса деярли ҳеч қандай самара бермайди.

Тавсиялар:

• Патчини ўрамида кўрсатилган вақтдан узоқ терида тутиб бўлмайди.
• Таркибида сув мавжуд экани туфайли патчидаги намлик кетганидан кейин тери ҳам қуруқ бўлиб қолиши мумкин.
• Янада яхшироқ таъсир қилиши ва шишлардан дарҳол қутулиш учун патчиларни совиткичда сақлаш тавсия қилинади.
• Патчини нафақат кўз остига, балки буруннинг икки чети ва қошларнинг ўртасига ҳам қўйиш мумкин.