Европада коронавирусга чалинганлар сони кетма-кет иккинчи кун ўз рекордларини янгиламоқда. Беморлар сони бўйича суткалик максимал кўрсаткич учта мамлакатда — Греция, Италия ва Швейцарияда қайд этилган.
Грецияда ўтган кун давомида 35 580 киши COVID-19 билан касалланган, 72 киши вафот этган. Греция миллий соғлиқни сақлаш ташкилоти ҳисоботига кўра, мамлакатда вирус билан касалланганларнинг умумий сони 1,17 миллиондан ошди, вафот этганлар эса 20 минг кишини ташкил этмоқда.
Италияда бир суткада касалланганлар сони биринчи марта 100 мингдан ошди – ўтган кун давомида мамлакатда 126 888 кишида вирус аниқланган, 156 киши вафот этган, деб ёзмоқда Reuters маҳаллий Соғлиқни сақлаш вазирлигига таяниб. Мамлакатда касалланганлар сони 5,9 миллиондан ошди, вафот этганлар эса 137 минг нафарни ташкил этмоқда.
Швейцарияда бир кеча-кундуз давомида яна 19 032 кишида COVID-19 қайд этилган, 23 киши вафот этган. Бу ҳақда маҳаллий федерал соғлиқни сақлаш бошқармаси Twitter’да маълум қилган. Мамлакатда касалланганлар сони 1,3 миллиондан, вафот этганлар эса 12 минг нафардан ошди.
Шунингдек, АҚШда ўтган кун давомида ярим миллиондан ортиқ одамда коронавирус аниқланган. Бу ҳафта Буюк Британия, Португалия, Францияда ҳам инфекция юқтирганлар сони бўйича рекордлар янгиланганди. Россияда коронавирусдан кунлик касалланиш ва ўлим даражаси пасаймоқда. Мамлакатда кетма-кет учинчи кун 22 мингдан кам одам COVID-19 билан касаллангани аниқланди.
Ўзбекистонда 29 декабрь куни сўнгги 6 ой ичида илк бор коронавирусдан ўлим ҳолати қайд этилмагани ҳақида хабар берилганди.
Изоҳ (0)