Халқ депутатлари Уйчи туман кенгашининг навбатдан ташқари сессияси бўлиб ўтди. Бу ҳақда «Дарё» мухбири Азизбек Абдувалиев хабар бермоқда.
Сессияда ташкилий масала кўрилди.
Вилоят ҳокими Шавкат Абдураззоқов депутатларга саломатлиги туфайли туман ҳокими лавозимини тарк этган Муҳаммадзокир Маматханов ўрнига Шуҳрат Мусаев номзодини таклиф этди.
Маълумот учун, Муҳаммадзокир Маматханов 2021 йил 30 ноябридан эътиборан саломатлигини тиклаш мақсадида даволанаётган, ҳоким вазифасини унинг биринчи ўринбосари Шокиржон Имамов вақтинча бажараётган эди.
Шуҳрат Мусаев 1973 йили Чортоқ туманида туғилган. Маълумоти олий, 1996 йили Андижон муҳандислик-иқтисодиёт институтини тамомлаган.
1996 йилдан 2017 йилга қадар Намангандаги иқтисодий ташкилотлар ва вилоят ҳокимлигида турли масъул вазифаларда меҳнат қилган. 2017 йилдан 2021 йилга қадар вилоят касаба уюшмалари ташкилотлари бирлашмасини бошқарган.
У 2021 йилдан бери Наманган вилояти ҳокимининг ўринбосари—Маҳалла ва оилани қўллаб-қувватлаш бошқармаси бошиғи лавозимида ишлаб келаётган эди.
Кенгашга номзоднинг Уйчи туманини ижтимоий-иқтисодий ривожлантириш бўйича йўл харитаси тақдим этилди. Депутатлар номзодни маъқуллаб, овоз берди. Шуҳрат Мусаев Уйчи тумани ҳокими этиб тасдиқланди.
Эслатиб ўтамиз, бу Наманган вилоятидаги тўртинчи ҳоким алмашинуви бўлди. Уйчи туманига қадар Косонсой, Норин ва Учқўрғон туманларида янги ҳокимлар иш бошлаганди.
Изоҳ (0)