«Кунига 750 доллар топардим». 20 дан ортиқ Голливуд фильмида суратга тушган Алихан Green Card’и бўла туриб, Америкага кетмаётгани сабаби ҳақида (видео)

Актёр Алихан (Нурмуҳаммад Хусниддинов) Salom live YouTube каналига берган интервьюсида Америкадаги 10 йиллик ҳаёти давомида нима ишлар қилгани, Green Card’и бўлса ҳам у ерга яшаш учун кетмаётганига нима сабаб бўлгани ҳақида гапирди.

«Қилмаган ишим қолмаган, тўғриси. Бир хил одамларга ўхшаб виллада яшаяпман ёки мана бу менинг виллам деб, Mercedes’нинг олдида расмга тушиб, пафос ясагим келмайди. Тўғрисини айтсам, пол артишдан тортиб идиш ювишгача, қилмаган ишим қолмаган. Биринчидан, у ерда талабаман. Эрталабдан кечгача ишлашга ҳақимиз йўқ, ҳуқуқимиз ҳам. Бу дегани ҳар қандай иш сизни қучоқ очиб кутиб олмайди. Ҳам тилни билмайман. Тил ўрганишга энди қадам босганман. Қисқа қилиб айтадиган бўлсам, ресторан ёки McDonald’s каби фастфудларда идиш-товоқ ювишдан бошлаб, секин-секин гамбургер тайёрлашга, ундан кейин етказиб бериш хизматига ўтиб, шу тарзда нолдан бошлаганман. Америкага бордингиз, тил билмайсиз ва пул йўқ. Шундан бошлаб, 10 йил ичида анча ишларда ишлаб чиқдим. Green Card ҳам беришди. Тўғрисини айтсам, қилмаган ишим қолмади. Тошкентга келганимдан кейин уйланиб, ота-она, оила ва фарзандлар олдида қолдим», – дейди актёр.

«Американи соғиниб турасизми ҳозир?», – деган саволга актёр қуйидагича жавоб беради:

«Пицца ейишни соғинаман. Чунки ҳали Ўзбекистонда, Тошкентда, бирор жойда ҳали Америкада еган пиццани таътиб кўрмадим. Пиццачилар бўлса, мени кўришсин, чақиришсин, таклиф қилишсин. Ваҳоланки, 80 фоиз бренднинг номи «америкача». Болаларимни ҳар дам олиш куни айлантиришга олиб чиқаман. Барибир бу пицца ейиш билан тугалланади. Ҳар хил пиццалардан еб чиқдим, ҳали бирор марта Америка пиццасининг таъми, мазасини кўрганим йўқ. У ерга қайтиб, ишлашни, яшашни соғинганим йўқ. Билмадим, ўзимни қайсидир даражада «патриот» деб биламанми? Кўплар айтади, Green Card’инг бор, актёрсан, инглиз тилини биласан, нима қилиб юрибсан, деганлар жуда кўп-да. Лекин мен Ўзбекистонимда, оилам, онам, бола-чақам олдида бўлсам, у ерда уч сўм топгандан кўра, бу ердаги бир сўмда баракали бўлади».

Алихан, шунингдек, Голливуд фильмларининг оммавий саҳналаридаги иштироки учун унга қанча гонорар тўлашгани ҳақида ҳам гапирди.

«Америка билан бу ерда, мисол учун, кунлик тўлов, албатта, ҳар хил. Оммавий саҳнада иштирок этганимизда, 8 доллардан ёзилар эди. Ўйнаса, ўйнамаса, бир четда ўтирса ҳам соатига 8 доллардан бошланар эди. Камида 8 соат бўлади. Кейинчалик эпизод ролларда ўйнаганимда, 10 йил аввал десак, ўша вақтда бир кунлик даромадим 750 доллар бўларди», – дейди актёр.