Ўзбекистонда аҳолининг ҳуқуқий саводхонлигини ошириш, қонун ҳужжатлари мазмун-моҳиятини кенг аҳоли оммасига тезкор ва тушунарли етказишдаги хизматлари учун бир гуруҳ давлат органлари ва ташкилотлар ходимлари, ОАВ вакиллари ҳамда жамоатчилик фаоллари «Ҳуқуқий тарғибот ишлари аълочиси» кўкрак нишони билан тақдирланди. Тақдирланганлар орасида «Дарё» бош муҳаррири Муҳримхон Аъзамхўжаев ҳам бор.
Мазкур кўкрак нишони 6 декабрь куни Конституция қабул қилинганининг 29 йиллигига бағишлаб Адлия вазирлигида бўлиб ўтган тадбирда Русланбек Давлетов томонидан тантанали равишда ўз эгаларига топширилди.
Мазкур кўкрак нишони Адлия вазирлиги ташаббуси билан «Жамиятда ҳуқуқий онг ва ҳуқуқий маданиятни юксалтириш тизимини тубдан такомиллаштириш тўғрисида»ги президент фармони асосида таъсис этилган. Кўкрак нишони билан тақдирланган шахсларга БҲМнинг 4 баравари (1 080 000 минг сўм) миқдорида бир марталик пул мукофоти ҳам берилади.
Тадбирда, шунингдек, «Ҳуқуқий тарғибот ишлари аълочиси» кўкрак нишони ўз соҳибларига топширилди. Ушбу нуфузли мукофот билан аҳоли орасида ҳуқуқий маданияни кенг тарғиб қилишда жонбозлик кўрсатиб келаётган турли касб эгалари ва жамоатчилик фаоллари тақдирланди.
Бундан ташқари, Адлия вазирлиги томонидан биринчи маротаба Конституциявий суд билан ҳамкорликда фуқароларнинг Конституция ҳақидаги билимларини синовдан ўтказиш, аҳолининг ҳуқуқий онги ва ҳуқуқий маданиятини юксалтириш мақсадида ўтказилган умуммиллий Конституция имтиҳони ғолиблари ҳам мукофотланди.
Имтиҳонда жами 50 минг нафардан ортиқ иштирокчи рўйхатдан ўтган бўлиб, иштирокчиларнинг ижодий саволларга жавоблари баҳоланиб 10 нафари финал босқичига йўл олган эди. Финал босқичи натижаларига кўра 3 нафар фуқаро ғолиб деб топилди.
Ғолиблар қуйидагича мукофот берилган:- биринчи ўрин — 15 миллион сўм;
- иккинчи ўрин — 10 миллион сўм;
- учинчи ўрин — 5 миллион сўм.
Бундан ташқари, бир гуруҳ адлия ходимлари самарали меҳнати, ҳуқуқ ижодкорлиги ва ҳуқуқни қўллаш амалиётини шакллантиришда қўшаётган ҳиссаси учун адлия вазири буйруғи билан таъсис этилган «Адлия аълочиси» кўкрак нишони ҳамда фахрий ёрлиқлар билан тақдирланди.
Изоҳ (0)