Бритни Спирс 40 ёшда: Ошпаз ва ўқитувчи оиласида туғилган қизча қандай қилиб миллионлаб инсонларнинг севимли хонандасига айланди?

2021 йилнинг 2 декабрь куни миллионлаб мухлисларнинг севимли хонандаси Бритни Спирс 40 ёшни қарши олди.

Бритни Спирс 1981 йил 2 декабрда Американинг Маккомб шаҳрида туғилган. Онаси Линн Айрен Брижес бошланғич мактаб ўқитувчи бўлиб ишлаган ва аэробика бўйича мураббийлик ҳам қилган. Унинг отаси Жеймс Парнелл Спирс архитектура муҳандиси ва ошпаз лавозимини эгаллаган. Болалигида ота-она қизини қўллаб-қувватлаб, унинг истеъдодини ривожлантиришга ёрдам беришга ҳаракат қилди.

Бритни беш ёшидан бошлаб бадиий гимнастика билан шуғулланди ва хорда қўшиқ куйлади. Саккиз ёшга тўлганида эса у телевизорда «Микки Маус клуби» болалар телекўрсатуви учун эълон қилинган кастингни кўриб қолади. Ота-онаси Бритнини у ерга олиб боришга рози бўлади, бўлажак хонанданинг омади келади ва синовдан ўтади. Лекин дастур ташкилотчиларини Бритнининг ёши ўйлантирар эди. Шу тариқа Бритни Нью-Йоркдаги мактаблардан бирига ўқишга юборилди, у ерда бўлажак юлдуз актёрлик маҳоратини ўзлаштирди.

Карьера

Бритни илк бора катта саҳнада 13 ёшида чиқиш қилди, бу Star Search vokal танловида иштироки туфайли эди, аммо орзулар амалга ошмади. У фақат иккинчи босқичга чиқа олди. Орадан бир йил ўтгач, «Микки Маус клуби» шоуси ижодкорлари Бритни иштирок этишга тайёр, деган қарорга келди. Энди орзулар ушалди деганда, бир йилдан сўнг дастур ёпилди ва Бритни ўз шаҳри ва мактабига қайтди. Шунингдек, у қўшиқчи бўлиш орзусидан воз кечмаганди. У Уитни Хьюстоннинг бир нечта қўшиқларини куйлаб кўрди ва адвокат Ларри Рудольф ёрдамида унинг ижроси «Микки Маус клуби»нинг собиқ продюсерларига етиб келди.

1998 йилда ёш хонанда Jive Records билан биринчи шартномасини имзолади ва Мак Мартин унинг продюсери бўлди. Орадан бир йил ўтиб, 1999 йил январь ойида Бритнининг «Baby One More Time» деб номланган биринчи альбомининг премьераси бўлиб ўтди. Ушбу тўплам туфайли қўшиқчи машҳурликка эришди.

Энди у Американинг кўплаб шаҳарларига концертлар билан ташриф буюра бошлади, шундан сўнг 2000 йилда «Oops! ... I Did It Again» номли иккинчи альбомини чиқарди, бу биринчисидан кам бўлмаган машҳурликка эришди. Бритни йирик компаниялардан таклифлар ола бошлади ва 2001 йилда у Pepsi рекламасида суратга тушди. Худди шу йили унинг «Бритней» деб номланган учинчи альбоми чиқди.

Шахсий муаммолар туфайли Бритни икки йил давомида саҳнага чиқа олмади, лекин ижодга қайтганидан сўнг у «Toxic» қўшиғини ўз ичига олган «In the Zone» альбомини чиқарди – бу тарона учун у «Грэмми» мукофотига сазовор бўлди. Аммо хонандага машҳурликни «Femme Fatale» альбоми олиб келганди, чунки у ҳали сотувга чиқмасидан аввал интернетда оммалашиб улгурган.

2011 йилда Бритни Риҳанна билан дуэт куйлади, бу «S&М» қўшиғининг ремикси эди. Бироқ хонандалар мухлисларига ваъда қилинган клипни ҳеч қачон тақдим эта олмади. 2016 йил август ойида «Slumber Party» таронасини ўз ичига олган «Glory» альбоми чиқди. Альбом YouTube’да машҳурликка эришди ва Бритни  бу ўзининг севимли термаларидан бири эканини маълум қилди. 2019 йилда юлдуз отасининг касаллиги туфайли концерт фаолиятини вақтинча тўхтатаётгани ҳақида баёнот берди.

Оила ва шахсий ҳаёт

2001 йилда Бритни саҳнани тарк этди, чунки биринчи бўлиб бувиси вафот этди ва бироздан кейин ота-онаси ажрашишга қарор қилди. 2007 йилда юлдуз холасидан айрилди. Кўпчилик хонандани гиёҳванд моддаларни қабул қилади, деб гумон қила бошлади. 2008 йилда Бритни тиббий марказга ётқизилди, чунки у ҳатто полиция иштирокида ҳам болаларини эрига топширишдан бош тортганди. Хонанда текширувдан ўтди, унга кўра Бритнининг танасида гиёҳванд моддалар ва спиртли ичимлик йўқлиги аниқланди. Икки кундан кейин у озодликка чиқарилди.

Бритни карьерасининг дастлабки йилларида хонанда Жастин Тимберлейк билан яқин муносабатда бўлган. Жуфтликнинг муносабатига тахминан тўрт йил – Бритнининг иккинчи гастрол сафаридан кейин нуқта қўйилди. 2004 йилда хонанда Жейсон Александр билан турмуш қурди. Бироқ икки кундан кейин эндигина турмуш қурганлар ажрашиш учун ариза берди. Ушбу ҳолатга Бритнининг изоҳ беришича, у ўзини шунчаки келин каби ҳис қилиб кўрмоқчи бўлган.

2004 йилнинг ўзида қўшиқчи иккинчи марта турмушга чиқди, бу сафар куёв Кевин Федерлайн эди. Лекин ҳаммаси жиддий эди, оилада икки фарзанд туғилди – ўғиллари Шон ва Жейден. Иккинчи туғруқдан кейин Бритни Кевин билан ажрашишга қарор қилди. Бу ажрим унга жуда кўп муаммоларни келтирди. Ўша пайтда Бритни гиёҳванд моддаларни қабул қилишда гумон қилингани сабабли унинг собиқ эри васийликни олиш учун хонандани судга беришга муваффақ бўлди.

2016 йилнинг кузида Бритнининг бодибилдер Сем Асгари билан муносабатлари ҳақида миш-мишлар пайдо бўлди. Аввалига жуфтлик муносабатлари ҳақида изоҳ бермади, лекин тез орада улар турли тадбирларда бирга чиқишни бошлади. 2021 йил сентябрь ойида Бритни ўзининг Instagram саҳифасида пост жойлаштирди ва кузатувчиларига бўлажак турмуш ўртоғини кўрсатди.

Васийлик

Кевин Федерлайннинг болалари билан боғлиқ суд жараёнларида қўшиқчи вақтинчалик руҳий ожиз деб топилди ва Спирснинг отаси васий этиб тайинланди. Ўшандан бери ота-она қизининг ҳаёти, жумладан, даромади ва карьерасини тўлиқ назорат қилади. 2019 йилда Жеймс ичак операцияси туфайли касалхонага ётқизилди ва Бритни яна психиатрия муассасасига йўл олди. Ушбу воқеалар туфайли Лас-Вегасдаги шоу расман бекор қилинди.

Узоқ вақт давомида қўшиқчи отаси билан курашди ва ўз устидан васийликни олиб ташлашга ҳаракат қилди. Суд мажлисларининг бирида у отаси жойлаштирган реабилитация марказида унинг барча шахсий буюмлари олиб қўйилгани, кеча-ю кундуз қўриқлаш тизими ўрнатилгани, шунингдек, унинг дўсти ва яқинлари билан учрашишга имкони ҳам йўқлигини айтди. Аввалига суд таниқли шахсга далил етарли эмаслигини маълум қилиб, отасини васийликдан маҳрум қилишни рад этди.

Бир мунча вақт ўтгач, 2021 йилнинг ёзида Жеймс Спирс ўз қизининг васийлигидан бош тортди. 2021 йил сентябрь ойида Бритнининг отаси қизининг васийлик ҳуқуқини бекор қилиш учун судга мурожаат қилган. Жеймс дастлаб вақтинча ўз вазифаларидан четлатилди. 2021 йил 13 ноябрда Лос-Анжелес суди хонандани отасининг қарамоғидан бутунлай озод қилди ва Бритни ўз мулки ва пулларини ўзи бошқариш ҳуқуқига эга бўлди.