Жаҳонгир Ортиқхўжаев Учтепа ҳокимлигидаги беш нафар мансабдорни ишдан бўшатди

Тошкент шаҳар ҳокими Жаҳонгир Ортиқхўжаев Учтепа тумани ҳокимлигида ўтказилган йиғилишда бир қатор масъул лавозимдаги мансабдорларни лавозимидан озод этди. Бу ҳақда шаҳар ҳокимлиги хабар қилди.

Қайд этилишича, сектор раҳбарлари, шаҳар ҳокими ўринбосарлари, бошқарма ва ташкилотлар масъуллари иштирок этган тадбирда ишчи гуруҳ томонидан Учтепа туманида аниқланган хато ва камчиликларга жиддий баҳо берилган. Жаҳонгир Ортиқхўжаев амалга оширилган ижобий ишларни эътироф этган ҳолда, кўпгина соҳаларда баъзи масъулларнинг ўз вазифасига лоқайд, масъулиятсиз, юзаки ёндашиш ҳолатлари мавжуд эканини кескин танқид қилган.

Таъкидланишича, ишда йўл қўйган камчиликлари учун туман ҳокимининг ўринбосарлари Н.Исматов, Л.Алманов, мактабгача таълим бўлими бошлиғи Н.Хантўраева, халқ таълими бўлими бошлиғи Ў.Қурбонов ҳамда туризм ва спорт бўлими бошлиғи Б.Насибалиев лавозимидан озод этилган. Туман ҳокими Ф.Абдуллаевга ҳайфсан берилган.

Шунингдек, йиғилиш якунида мутасаддиларга ўз фаолиятини жиддий кўриб чиқиш, танқидлардан тегишли хулосалар чиқариш, ишда ижобий ўзгаришлар қилиш вазифаси юклатилган. Ўрганишлар давомида аниқланган камчиликларни қисқа муддатларда бартараф этиш, келгусида шунга ўхшаш камчиликлар келиб чиқишининг олдини олишга қаратилган тизимли ишларни ташкил этиш топширилган.

Эслатиб ўтамиз, 16 сентябрь куни пойтахт ҳокими Жаҳонгир Ортиқхўжаевнинг тегишли фармойиши билан Тошкент шаҳрининг учта — Мирзо Улуғбек, Юнусобод ва Янгиҳаёт туманлари ҳокимларига ҳайфсан берилганди.

Шунингдек, Самарқанд вилоятида 3 нафар ҳоким ва 20 нафар ҳоким ўринбосарига огоҳлантириш ҳамда ҳайфсан берилгани, Хоразмдаги 12 та шаҳар-туман ҳокимларига жарима ва ҳайфсан жазо чоралари қўлланилгани ва Қорақалпоғистонда тўрт вазир ҳайфсан олгани хабар қилинганди.