«Интерфакс» Польша—Беларусь чегарасида тўпланган ноқонуний муҳожирлар акс этган суратларни эълон қилди.
Маълум бўлишича, 8 ноябрь куни чегарадаги вазият ёмонлашган. Бир неча минг муҳожир Беларусь томондан Европа Иттифоқига кўчиб ўтиш истагида бўлган.
Еврокомиссия Беларусь ҳукуматини муҳожирлар оқимини уюштирганликда ва Европа Иттифоқига киришга рухсат ололмаган мигрантларни ортга қайтармаганликда айбламоқда.
Эслатиб ўтамиз, 24 октябрь куни Беларусдан 60 га яқин ноқонуний муҳожир Польша ҳудудига киришга уринган, оқибатда икки аскар яраланганди. Шунингдек, интернетда Беларусдан Польшага кетаётган қочқинлар карвонини акс эттирувчи видеолар тарқалган. Польша ҳукумати чегарани бузишга тайёргарликлар ҳақида огоҳлантирганди.
Бундан ташқари, Литвада баҳордан миграция инқирози бошлангани, мамлакатга Яқин Шарқ ва Африка мамлакатларидан юзлаб фуқаролар — бари Беларусь орқали — кириб келаётгани хабар қилинганди. Қайд этилишичам 2020 йил билан солиштирганда ноқонуний муҳожирлар оқими 39 бараварга кўпайган. Лукашенко муҳожирларнинг Литва билан чегарадан ноқонуний ўтишига Беларусь расмийлари халал бермаслигини очиқчасига айтиб, буни гибрид уруш деб атаган.
Литвада июль ойининг охирида фавқулодда ҳолат режими жорий қилинганди. Мамлакат Беларусь билан чегарада тўсиқ қуришни бошлаган. Шунингдек, Литва ҳукумати ўз ихтиёри билан мамлакатни тарк этишга рози бўлган ноқонуний муҳожирларга 300 евродан тўлашга ваъда бермоқда. Кеча, 9 октябрь куни эса Литва ҳукумати Беларусь билан чегарада фавқулодда ҳолат жорий этилишини маъқуллагани ҳақида хабар берилди.
Бундан ташқари, октябрь ойида Германия чегарасини бир ой ичида 1,3 минг муҳожир ноқонуний кесиб ўтишга урингани маълум қилинган. Қайд этилишича, Беларусь ва Европа Иттифоқи чегарасидаги миграцион инқироз Александр Лукашенконинг Минск энди Европани муҳожирлардан ҳимоя қилмоқчи эмаслигини айтганидан кейин бошланган. Шундан сўнг, оммавий ахборот воситаларида хабар берилишича, беларуслик чегарачилар чегарани ноқонуний кесиб ўтмоқчи бўлган одамларга жиддий тўсқинлик қилмаслик ҳақида яширин кўрсатма олган.
Изоҳ (0)