Чарм матосидан тикилган классик бичимли куртка кузги ва қишки образлар учун айни муддао экани билан ўзига хос. Кенг ва эркин турадиган моделлар ичидан қалин свитер кийиб иссиқ юриш, қуёшли ҳавода эса енгил кўйлаклар билан романтик услубга эга бўлиш мумкин. Аммо нотўғри танлов асосида харид қилинган чарм курткалар бачкана кўринишга сабаб бўлиш билан бирга кейинги мавсумда долзарб бўлмай қолиши ҳам эҳтимолдан ҳоли эмас.
Биринчи хато — матонинг сифатсиз экани
Мода санъати табиатга зарар етказиши мумкин бўлган матолардан фойдаланишдан воз кечмоқда. Шундай матолар орасида табиий чарм ҳам йўқ эмас. Ривожланган технологиялар туфайли чарм ўрнини босувчи бошқа матодан тикилган куртка ҳам совуқдан ҳимоя қилиши мумкин. Аммо сифатсиз бўладиган бўлса узоқ хизмат қилмасдан ташлаб юборилиши ва бу ҳам табиат учун зарарли бўлиши мумкин. Шу сабаб ҳам харид борасида эътиборли бўлиш муҳим саналади. Сотиб олишдан аввал кийиб кўриш, ҳаракатланиш ва деформацияси бор ёки йўқлигини кўздан кечириш керак. Агар чизиқлар ва излар кузатиладиган бўлса бошқа вариантни танлаган яхши. Бу борада винтаж услубидаги моделлар айни муддао бўлиши мумкин.
Иккинчи хато — ёпишиб турадиган бичим ва нотўғри узунлик
Бичим ва узунлик алоҳида аҳамиятга эга. Юлдузларнинг 90 йилда кийган чарм курткалари ҳали ҳамон долзарб экани бунинг исботи. Шундай экан тор ва нотўғри узунликдаги моделларни харид қилишдан қочиш, бунинг ўрнига кенг турадиган ва белгача узун турадиган вариантларни танлаш тавсия қилинади. Урфдан аллақачон қолганидан ташқари, тор курткаларни ичидан кенг жемфер ва свитерларни ҳам кийиб бўлмайди.
Учинчи хато — ултразамонавий ёқа
Ёқа — куртканинг деярли ҳар мавсум ўзгариши мумкин бўлган қисми ҳисобланади. Баъзида катта ва ҳажмли ёқалар долзарб бўлса, бошқа вақт дизайнерлар ушбу деталдан воз кечишни афзал билиши мумкин. Бир мавсум кийганингиздан кейин сандиқда ётишини истамасангиз, мўйнали ва бачкана бўлмаган моделларга эътибор қаратинг.
Тўртинчи хато — аллақачон урфдан қолган безак
Аксарият кишилар танлов чоғида майда деталларга эътибор бермайди. Аслида эса эътибордан четда қолган бу каби жиҳатлар образни кўнгилдагидек чиқмаслигига сабаб бўлиши мумкин. Ортиқча ва урфдан қолган безак курткани аллақачон долзарб эмаслигини билдириш мумкин. Шу сабаб турли қадалган тугма, кашта, тош ва кўзли курткаларни харид қилишдан қочинг. Ички қисмининг танги куртканинг рангига мос бўлишига ҳам эътибор қаратинг.
Бешинчи хато — гардеробдаги кийим-кечакларга мос бўлмаган курткани танлаш
Харид қилаётган курткангиз ранги гардеробдаги кийимлар билан кийганда уйғун кўриниши керак. Классик қора, қаймоқ ранг ёки жигарранг, тўқ яшил вариантлар универсал ҳисобланади. Ёрқин кўк ва шунга ўхшаш тренддаги рангларни танлашдан аввал кийимлар ва образга мос келиши ёки йўқлигини ўйлаб кўриш керак.
Мавзуга доир:
Изоҳ (0)