2022 йилда Шанхай ҳамкорлик ташкилоти давлат раҳбарларининг навбатдаги саммити Самарқандда ўтиши кутилмоқда. Шу сабабли ва умуман олганда, Самарқандда жуда катта қурилиш ишлари кетмоқда. Telegram’даги «Давлетовуз» каналининг очиқ маълумотлар асосида маълум қилишича, аксарият йирик қурилиш-реконструкция ишлари Enter Engineering, ERIELL компаниялар гуруҳи бошқаруви раиси Бахтиёр Фазилов ва унинг яқинларига (Mirankul Group) тааллуқли компаниялар томонидан бажарилмоқда.
Самарқанд халқаро аэропортини реконструкция қилиш
Лойиҳа қиймати 238,2 миллиард сўмга баҳоланган. Реклама материалларига кўра, мазкур объектни реконструкция қилиш билан Enter Engineering компанияси шуғулланмоқда. Ҳукумат қарори билан Самарқанд аэропорти давлат-хусусий шериклик тамойили асосида 20 йилга Air Marakanda компаниясига бошқарувга берилган. Тендерсиз. «Gazeta.uz» маълумотларига кўра, компания 80 миллион доллар инвестиция киритиш мажбуриятини олган.
Air Marakanda компаниясининг ягона таъсисчиси офшорда — Кипрда рўйхатдан ўтган Drupola Holdings Limited компанияси ҳисобланади. Мазкур компания жойлашган юридик манзилда Ferkensco Management Limited ва Eriell Holding Company Limited компаниялари ҳам жойлашган. «Самарқандкимё»нинг 100 фоиз улуши ўз вақтида Ferkensco компаниясига нол қийматда сотилган эди.
Silk Road сайёҳлик марказини барпо этиш
212 гектарлик майдонда барпо этилган ушбу лойиҳанинг қиймати 353 миллион доллар бўлиб, буюртмачи Samarkand Touristic Centre компанияси ҳисобланади. Мазкур компаниянинг 60 фоиз улуши Бахтиёр Шуҳратович Фазиловга тааллуқли. Пудратчи ҳам буюртмачига алоқадор бўлган Enter Engineering компаниясидир.
Имом Бухорий зиёратгоҳининг янги мажмуаси қурилиши
Лойиҳа қиймати номаълум. Пудратчи Enter Engineering компаниялар гуруҳи бўлиб, 7 та меҳмонхона, 3 та автотураргоҳ ва автобекат, супермаркет, бозорча барпо этилади. Шунингдек, ошхоналар, ҳунармандчилик буюмлари растаси, ҳаммом, таҳоратхона, кушхона қурилиши режалаштирилган.
Самарқанд шаҳрида 168 ўринли мактаб қурилиши
Лойиҳа қиймати 74 миллиард сўм. Давлат харидлари портали маълумотларига кўра, мазкур объектнинг пудратчиси Innocraft МЧЖ ҳисобланади. Innocraft 2019 йил июнь ойида ташкил этилган бўлиб, асосий улуши — 99,80 фоиз улуш Mirankul Group хусусий корхонасига, Mirankul Group эса тўлиғича Усманов Отабек Алимжоновичга тегишли. Усманов Отабек ва Бахтиёр Фазилов Mirankul Stroy Servis, Mirankul Construction Маterials Ltd, Mirankul Group Tower, Mirankul Мeva (тугатилган), Paradise Gardens (тугатилган), Surxon Golden Fruits (тугатилган) каби компанияларда бевосита ёки билвосита улушдорлик қилган. Innocraft МЧЖ бундан ташқари қатор ижтимоий объектларни қуриш билан шуғулланмоқда.
Интернетдаги маълумотларга кўра, Сингапурда рўйхатда ўтган Enter Engineering компаниясининг 51 фоиз улушига Бахтиёр Фазилов Кипрда рўйхатдан ўтган Klintworth Investments компанияси орқали эгалик қилади. 19 фоизи эса Россиянинг «Газпромбанк»ига тегишли. Компания Инқирозга қарши курашиш жамғармаси маблағлари ҳисобидан Зангиота юқумли касалликлар шифохонасини ва бошқа объектларни ҳам қурган. Бахтиёр Фазилов, шунингдек, Wind Rose МЧЖ орқали Humo Arena савдо белгисига, Самарқандда Family Park компаниясига ҳам эгалик қилади. 2019 йилда «Фидокорона хизматлари учун» ордени билан тақдирланган.
Изоҳ (0)