Британиялик актёр ва Жеймс Бонд ҳақидаги фильмлар юлдузи Дэниэл Крейг 6 октябрь куни Голливуднинг Шон-шуҳрат хиёбонида ўз юлдузига эга бўлди. Тантанали маросим видеоси Hollywood Walk of Fame расмий сайтида эълон қилинган, деб хабар беради «Korrespondent.net».
Таъкидланишича, актёрнинг юлдузи Лос-Анжелесдаги туристлар учун диққатга сазовор асосий масканнинг 2704-юлдузига айланган. Ҳар йили Голливуддаги ушбу булварга ўн миллионга яқин одам ташриф буюради.
«Бу ҳақда гапираман деб ҳеч қачон ўйламаган эдим, аммо Голливуд бўйлаб ‘устимдан’ юриб ўтишлари менинг учун мутлақ шараф», — дейди Крейг маросимда.
Тантанали маросим Жеймс Бонд ҳақидаги «Ўлиш вақти эмас» картинасининг Америкада прокатга чиқишидан бир неча кун олдин бўлиб ўтди. Крейг «Жосус 007» ҳақидаги фильмларда ижро этган роли учун «юлдуз»га эга бўлган тўртинчи актёрга айланди. Бунга қадар ушбу шарафга Дэвид Нивен, Рожер Мур ва Пирс Броснан лойиқ кўрилган.
Аввалроқ Жеймс Бондни гавдалантирган актёрлар рейтинги эълон қилинганди. Унда биринчи ўринни Шон Коннери эгаллаган. Шунингдек, Дэниэл Крейг Жеймс Бонд каби Британия ҳарбий денгиз флотининг фахрий офицерига айланган.
Изоҳ (0)