Наманганда 18 ёшли қиз қариндошининг уйидаги сейфдан 1700 доллар, 2 млн сўм ва тилла узукларни ўғирлади

2021 йил 15 сентябрь куни Наманган вилоятининг Косонсой туманида яшовчи, 1967 йилда туғилган фуқаро ички ишлар идораларига уйида содир бўлган ўғрилик юзасидан мурожаат қилди. Бу ҳақда «Дарё» мухбири Азизбек Абдувалиев хабар бермоқда.

Маълум бўлишича, 12 сентябрь куни номаълум шахс уйда ҳеч ким йўқлигидан фойдаланиб, унинг ҳовлисига девор ошиб кирган ва ертўладаги сейфни очган. Сейфда бўлган 1700 доллар, 2 миллион сўм ва нархи 1,8 миллион сўм бўлган тилла узукларни ўғирлаб кетган.

Туманда тунги гуруҳ йўналишида хизмат олиб бораётган профилактика инспектори ва ЖҚБ вакиллари томонидан олиб борилган тезкор қидирув ва суриштирув ҳаракатлари натижасида ушбу жиноятни мурожаатчининг жияни, Косонсой туманида яшовчи, 2003 йилда туғилган аёл содир этганлиги аниқланган.

Ҳозирда ушбу ҳолат бўйича Косонсой туман ИИБ ҳузуридаги тергов бўлими томонидан Жиноят кодексининг 169-моддаси 2-қисми билан жиноят иши қўзғатилган.